獨家：27歲林穎彤高招收兵撇奀星冧舞蹈學校老闆誓要做上流

Mar 26 2020

現年27歲的林穎彤（Bella），近年因為冧掂星夢娛樂老闆何哲圖上位，唱歌、拍劇做主持工作不斷，不過脫貧唔係單靠工作，而係高招mark住一班富貴兵團，被捧後即撇甩拍拖兩年奀星容天佑，換上高等兵伍富橋陪出陪入，有四十萬戰車管接送，近日又黐實同樣獲老闆Herman（何哲圖）力捧的小鮮肉潛力兵劉子碩，左右逢源一樣得，真係人不可以貌相，咪小覷呢個妹妹仔呀！

撰文、圖片：東方新地

林穎彤撇奀星冧舞蹈學校老闆

林穎彤與訓練班出身奀星容天佑有兩年時間打得火熱，不過，拍完《城寨英雄》開始上位，Bella亦火速撇甩奀星，當時更搵阿媽做擋箭牌，表示媽咪反對拍拖要她珍惜前途，可惜大話好快被揭穿，冇耐已經與同公司星夢娛樂的新人伍富橋過從甚密，相信錢途比前途重要！相比容天佑乜都靠自己，出身小康家庭的伍富橋，入行不久已獲阿媽打本開舞蹈學校，又揸幾十萬Tesla出入，當然更得林穎彤垂青。

目標為本的林穎彤，17年飛甩奀星容天佑後，已火速收高等兵，與同公司星夢娛樂旗下的伍富橋打得火熱，出入有男方駕車管接送，生活升呢！

同奀星容天佑離合多次，17年5月正式分手，當時 Bella更指因媽媽唔想佢拍拖影響工作，因而放棄同對方一齊。

雖然仍是新人，伍富橋已經駕駛價值四十萬的Tesla代步，又開有舞蹈學校，家底不俗。

據知情者透露：「咪畀Bella妹妹仔外形呃到，佢其實好有機心，佢細細個就要捱窮，仲試過跟媽咪喺街邊行乞，令佢更加立誓要脫貧，一早就唔甘心住公屋，怕人睇佢唔起，入行初期，佢都唔敢同人講自己嘅出身，嗰時同容天佑拍拖，男方經常揸車接送佢返工放工，不過，只係靠呢行嘅收入有限，想生活升呢根本唔容易，識到Alvin（伍富橋），佢好快已經撇甩容天佑，成日去Alvin嘅舞蹈學校打躉，當正自己老闆娘咁款，不過喺呢行成十年， Bella依家媾仔好高招，唔會公開認拍拖封自己後路！」

有高等兵伍富橋管接送兼大獻殷勤，當日到埗後，Bella先在伍富橋座駕車廂補妝，落車後又吩咐男方幫佢放好物件，連手上裝住嘢的紙袋亦交伍富橋幫佢攞，當正對方阿四好使好用！

交咗袋嘢畀伍富橋後，Bella輕鬆攞住水樽自己行入電視城，即使男方被粉絲要求合照，她也未有理會同男方扮唔熟。

一石二鳥狂收兵有司機有小鮮肉

有高等兵伍富橋照顧周到，林穎彤出入變公主，日前伍富橋駕駛其價值四十萬的 Tesla接載她返電視城開工，到埗先在伍富橋座駕內補妝，男方又幫她攞嘢服侍周到，早已將伍富橋治得貼貼服服的她，拍完嘢更儼如女主人，攞住車匙帶住小鮮肉師弟劉子碩出來坐順風車，更被小鮮肉氹到笑唔停，有高等兵做司機，又有潛力兵氹笑，一石二鳥都唔會搞出個「嬲」字，名副其實冧仔高手！