馮盈盈被質疑「扮分手」轉地下情保事業 算命師：感情低調處理、有望做視后
廣告
馮盈盈、陸浩明(暱稱六號）、何遠東、戴祖儀等一班《後生仔傾吓偈》節目主持，日前邀得奇門遁甲雲文子師傅開心拍攝跨年節目《後生仔傾吓傾吓傾到2020》，成班後生追住師 傅問前程，非常熱鬧！
撰文、圖片：東方新地
馮盈盈與醫生男友4年情玩完 雲師傅指上位有望
前幾日先傳出馮盈盈同醫生男友分手，不過好快就有網民見到佢哋兩個去嘉年華玩，被人質疑轉地下情保事業，不過馮盈盈最終否認。對於感情事業，佢本人都好想八卦吓，難得見到師傅，當然要趁機問問雲師傅預測一下下年運勢。雲師傅坦言於芸芸上位花旦中，非常欣賞盈盈反傳統嘅率真性格，內外俱備極有潛質，當然全力相助。
感情低調處理防暗湧 專注工作有望做視后
雲師傅表示：「以奇門遁甲推算盈盈流年命格帶『天心星』，代表得人心、中心人物、主角，所以鼠年觀眾緣、事業運會大大提升，由依家開始會一劇接一劇，應該好好把握時機加強自己演技，以視后為目標，將能成為天上閃亮嘅星星。應先專注工作，感情低調處理以防暗湧。」盈盈仲後生唔憂嫁，當然要向事業衝刺！
至於六號，師傅話佢財運非常旺：「啱啱呢兩個月應該有工作傾緊，將會喺年頭成事。」六號開心透露：「雲師傅，咁就掂喎，啱啱真係傾緊單嘢！」
