25歲嗲精余思霆愛露肉 華姐冠軍與朱敏瀚低調拍拖保前途

撰文：東方新地、圖片：東方新地/余思霆IG

朱敏瀚操肌開竅成功上位

17歲中學畢業後，朱敏瀚投考無綫藝員訓練班入行，對演戲有好大憧憬，可惜被斯文瘦弱外形局限，每每只被派演主角年輕版及做主角細佬角色，發揮機會不多，更曾因體弱多病而試過失去角色。直至18年接拍劇集《機場特警》，朱敏瀚終於開竅，努力操肌洗走孱仔形象，拓闊戲路，真係多咗好多演出機會，好似喺《反黑路人甲》，佢已經升呢做男三，機會不斷，收入自然增加，近日就見到佢同女友華姐冠軍余思霆去商場歎咖啡，近期劇接劇變忙人的朱敏瀚，即使約女友拍拖亦行色匆匆，只揀去連鎖快餐式咖啡店歇腳，短聚一個鐘便離開。

二人低調拍拖保前途

18年被揭同嗲精華姐余思霆拍《好日子》撻著，當時余思霆仍與天堂鳥成員 Tyrese交往，Brian亦有拍拖幾年的女友，更被指各背另一半偷食，由死口唔認到公開戀情，轉眼拍拖兩年，兩人愛得依然甜蜜，不過轉變的是，捱出頭的朱敏瀚，終於事業超前女友，不用再被指女尊男卑。

據知情者透露：「之前爆出四角關係立立亂，公司都有捉佢兩個去照肺，雖然依家感情穩定，仲一齊同居，但話晒事業啱啱上位，Brian唔想阻礙前途，同女友有共識將感情低調，而且 Brian好大男人，佢希望自己可以賺錢養起女友，所以都定咗呢兩年會努力做嘢，事業行先！」

事業爆忙的朱敏瀚，日前亦爭取時間約女友見面，做埋柴可夫載同女友到銅鑼灣歎啡，不過短短一個鐘，他大部份時間掛住傾電話，不過女友余思霆就毫不介意，冧仔功力十足，排隊買飲品時不停對住男友甜笑，之後更加體貼叫男友先搵座位坐低，由她獨個兒等攞飲品，男友講電話亦不會打擾，自己坐埋一邊玩手機打發時間，性格一凹一凸果然好夾！

女友愛露肉 IG狂晒泳衣照

26歲的余思霆，17年當選華姐至今冇乜作品令人有深刻印象，最出位反而是經常愛晒身材做武器，在她個人社交網內便有不少泳衣照。