郭富城、林峯情傾內地模特兒 13對中港情緣夫妻逐對look

撰文、圖片：東方新地

郭富城 方媛

天王城城歷年緋聞無數，06年戀上名模熊黛林，可惜拍拖七年都係分手收場，當人人以為城城做老襯機會極微時，15年竟一反常態公開與內地網紅方媛嘅戀情，17年再喺半島擺酒娶妻，如今已經生咗兩個可愛囡囡。

林峯 張馨月

拍拖五年、曾經公開吶喊七次「 好愛BB」，又有邊個估到，林峯同吳千語話分就分！ 18年三月，林峯與內地模特兒張馨月同遊海洋公園令戀情曝光，19年10月被爆入紙結婚，上月27日，40歲林峯正式宣布女兒出世。

周勵淇 傅浤鳴

03年與鄭嘉穎展開地下情，至08年有傳被佘詩曼介入而正式分手。飽受情傷嘅周勵淇趁著北上發展亦順勢展開一段又一段中港情緣，11年因為拍劇撻著內地小生徐正曦，不過未能開花結果，至18年宣布與內地軍部演員傅浤鳴結婚，今年五月誕下兒子。

郭羨妮

郭羨妮早年北上拍劇時，與內地武指朱少杰相識相戀，2011年於關島秘密結婚，翌年誕下囡囡 Kylie。朱少杰長年在內地拍戲養家，兩公婆長期分隔兩地。

鍾麗緹 張倫碩

02年與第一任丈夫Glen Ross離婚、11年與第二任台灣音樂人嚴錚結束七年婚姻，2015年，北上發展多年嘅鍾麗緹因為合作真人騷與年輕十一年嘅內地男藝人張倫碩相戀，16年11月正式結婚，同兩任前夫所生嘅三個女都改埋姓張。

羅家良 蘇岩

人稱撈家、曾經係當家小生兼師奶殺手，羅嘉良與前妻方敏儀拍拖16年於98年結婚並育有一子。08年離婚後，羅嘉良火速於翌年與拍劇結識嘅內地演員蘇岩結婚，並從此定居北京。13年4月，羅嘉良與蘇岩誕下一女，中文名為羅詠婷。

李彩華

林峯初戀女友李彩華同樣最終都係喺內地搵到終身幸福！16歲出道、經歷過被天后杯葛、幫父親還巨債，又自爆因為拒提供特別服務與前經理人公司解約後，李彩華06年北上發展，捱足多年終於劇接劇買樓變小富婆，亦結識內地有米男友EricHuang，去年2月榮升人妻。

蔡少芬 張晉

當年紅透半邊天又係當家花旦，蔡少芬喺江蘇拍攝電視劇時與寂寂無名仲做緊武術指導嘅張晉相戀。女尊男卑、異地兼姊弟戀一直不被睇好，不過最終修成正果結埋婚再生埋兩女一子。最近兩公婆拍住北上做真人騷賺人仔，蔡少芬更於節目中透露，拍拖四年來自己係逼婚嗰個！

張衞健 張茜

九十年代已經北上發展，97年張衞健拍劇時結識客串丫鬟嘅張茜，99年二人再次合拍電視劇 《陳夢吉傳奇》更飾演情侶，日對夜對兩個月終於撻著。拍拖六年、分分合合，最終於04年結婚。雖然經歷過兩次痛苦小產經歷，不過兩公婆反而更珍惜另一半恩愛有加。

洪欣 張丹峰

96年曾經閃婚閃離、00年為莫少聰誕下兒子然後一直獨力撫養，09年當時39歲嘅單親媽洪欣終於宣布再婚，另一半係年輕十年嘅內地演員張丹峰。婚後誕下一女、一家和諧，連長子都同繼父感情深厚，不過張丹峰一而再被指與經理人畢瀅關係曖昧，至今兩公婆未見再合體重現恩愛場面。

魏駿傑

想當年喺好多人心目中， 「程峰」魏駿傑同 「三元」滕麗名至係一對，可惜二人相戀九年後分手。男方堅稱不涉第三者，不過翌年月已經火速與年輕二十年嘅重慶女大學生張利華結婚。二人婚後誕下一女，可惜多年來屢傳婚變，年初一早五官進化嘅張利華更被發現與外籍banker交往。

吳啟華 石洋子

95年結束第一段婚姻，吳啟華02北上發展，07年與年輕21年嘅內地女演員石洋子結婚並生下女兒吳熙兒，14年結束婚姻時，外界盛傳因為女方洗腳唔抹腳係大花筒，不過吳啟華一直維護前妻，據悉婚後仍然全權負擔前妻、女兒甚至岳母供書教學生活費，每月支出高達廿萬。

劉愷威 楊冪

劉愷威屬於較早一批北上發展嘅香港藝人，08年已經喺內地當紅躋身一線小生行列。11年更因為拍攝劇集與當年嶄露頭角嘅楊冪撻著，14年結婚、同年生女。可惜為人母後嘅楊冪事業心重愈戰愈強，兩公婆愈行愈遠，18年終於各行各路離婚收場。