鄭中基率原班人馬拍《龍咁威3》計劃擱淺？！鄭中基親身確認係港產片 + 10大經典場口回顧
編輯：東方新地 ｜原文：NewMonday｜圖片：新傳媒圖片、電影截圖、電影劇照
傳《龍咁威3》拍攝計劃暫停 鄭中基：由頭到尾都係港產片
相信《龍咁威》係唔少人童年回憶，尤其當年扮警訊的「瑞士山區肺騙案」更係深入民心！不過，本來計劃原班人馬再開拍的《龍咁威3》就唔太順利，日前有傳媒引述，指《龍咁威3》因為題材問題禁止大陸上映，觸發「《龍咁威3》是否拍畀香港人睇」的疑團，作為主角及導演的「龍威」鄭中基就霸氣回覆網民，話「龍3由頭到尾都係計劃拍港產片」，無所謂咁話！網民紛紛大讚「暴龍哥重視香港電影市場」，就算搶唔到賀歲片檔期都一樣會入場支持😍！
《龍咁威》10大經典場口回顧
1. 真係MEKO水嚟喎！
第一次睇龍咁威經已被第一幕的交易吸引住，眼看龍威在褲浪位取岀手套及飲管，以極專業的態度一試貨品真偽，再同專係砵蘭街呃啊婆啲棺材本嘅玉面人趙應鶉講岀一句：「咦！真係MEKO水嚟喎！」（唔知呢個趙應鶉的人物設定同有線高層趙應春又有冇關呢？）
2. 白飯魚真係有白飯魚
由龍大雙先生創立嘅龍威體育用品公司係2003年度的旗艦級岀品，竟然是一對白！飯！魚！而這對只賣人民幣$19.9的白布鞋竟以在四川吸收天地靈氣的生曬白飯魚作氣墊膠囊，更可作為鞋的避震，抵受重擊！什麼air max，pump fury都要行埋一二邊。
3.皮膚科醫生洗介賴、髮型師狼狗
所謂有錢就做蝙蝠俠，無錢就做好警察。三子最害怕的正正是步入警察學堂。龍威貪靚就係人都知，始終他亦有另一個Model之王的身份（Mandom啊），三子的皮膚科醫生洗介賴亦提醒過他們，只能用Duve或Lux，絕對不能用蝦世界。至於狼狗就叫佢哋一定要用護髮素同要吹頭。
4. 燒槍燒到玩軍火
我諗唔使九叔多講大家都記得呢幕，跟據學警手冊第23項第23章第23條，學警可以依照自己興趣學習，加上那時的恐怖份子全球作案，學定點用軍火都係傍下身。
5. 試試啲腦汁，咦！仲諗緊嘢喎！
玩埋伏就當然係我伏吓你，你又伏下我，至於鄧Sirrrr呢，唔好講咁多，試試佢啲腦汁先。
6. 佢哋叫我做垃圾啊，我是廢紙〜
呢句直頭係人生大道理！
7. 都係嗰句啦，容易襯衫啊嘛！
買車買到買衫咁，應該真係得佢哋三個先做到。
8. 好消息，唔洗割包皮！
Whats up Man ! Whats up Man ! Whats up Man ! Boom ! 唔洗割包皮！ 好消息！唔洗割包皮！
9. 警訊
鄭中基喺《龍咁威》系列中，由佢主持嘅《警訊》就同張達明、李璨琛演嘅「瑞士山區肺騙案」，鄭中基扮騙徒嘅同黨，以一身空姐look現身非常突出，真係非常戲劇化又有喜劇感。
10. 喂！手足！幫手逗一逗！
《龍咁威3》明年開拍 原班人馬回歸
鄭中基喺去年公布未來電影計劃，除操肌拍攝新片《阿龍》，亦正籌備開拍佢嘅喜劇代表作《龍咁威3》。鄭中基透過助手回應表示的確會開拍《龍咁威3》，佢話原本想在今年年中開拍，19年賀歲檔上演，但不過依家可能要改到明年中開拍，目標係後年2020年嘅賀歲檔上映！佢仲話打算請2003年第一集原班人馬拍攝，由佢同谷德昭執導，演員就會有李璨琛、張達明同埋鄧麗欣(Stephy)，鄭中基補充話知道觀眾想Stephy可以接拍，故此希望就到檔期，能夠齊人演出。
鄭中基在《龍咁威》中，演不學無術富二代，最後在警隊中重拾勇氣。
鄭中基、李燦森和張達明在《龍咁威》中分別扮演的龍威、吳樹喜和黃金舟！
當年千嬅更在《龍咁威》客串一角！
05年《龍咁威2》口碑麻麻
《龍咁威》叫好叫座，但第二集《龍咁威之皇母娘娘呢?》搵嚟同樣係Mini Cookies成員嘅Miki做女主角，可惜口碑好差，悶戲連場一啲都唔好笑，所以大家點估到十多年後會開拍《龍咁威3》，仲由鄭中基執導，希望真係成事又係原班人馬演出，更加希望好過第二集啦！
當年嘅Miki眼大大走可愛路線，深得少男歡心，如今佢都已經做咗人妻同媽咪喇！
除咗Miki，第二輯仲加入同為Mini Cookies成員嘅傅穎同吳雨霏！
仲有已經離開咗我哋嘅魯芬BB，有佢搶鏡嘅演出，真係令套劇生色不少，可惜我哋只能憑住電影懷念佢！
《行運超人》
睇番鄭中基近年都好少拍電影，連新歌都冇乜！佢喺90年代以歌手身份出道，一頭長髮令人留下形象，而他都有好多經典情歌，好似如《晴天陰天雨天》、《我代你哭》等，之後佢都有參與電影演出，在2003情佢喺《行運超人》中扮演反派斷蟹一角，跟梁朝偉楊千嬅大鬥法，其中鄭中基扮女人一幕，真係喜劇才華大爆發！
《低俗喜劇》
之後在2012年他在《低俗喜劇》中演廣西暴發戶「暴龍哥」，一口鄉音兼熱愛食野味，極為搶鏡，鄭中基更憑此片奪台灣金馬獎及香港電影金像獎最佳男配角，成為電影事業一大突破，在影壇站穩陣腳！
《大樂師‧為愛配樂》
鄭中基在今年初《大樂師‧為愛配樂》中演有音樂天份的古惑仔，演技被指有大躍進，並提名今年4月香港電影金像獎最佳男主角，最後敗給《殺破狼‧貪狼》的古天樂。
延伸閱讀：
年卅晚開騷 三代同堂演出 鄭中基恨攞最喜愛男歌手
鄭中基(Ronald)一連五場的《鄭中基One More Time 世界巡迴演唱會—香港站》在2月4日於紅磡香港體育館揭開序幕。鄭中基對上一次開騷係2017年，同上次一樣個唱座無虛席。演唱會於晚上9時半開始，鄭中基先以白銀色造型唱出演唱會主題曲《One More Time》，再唱一連串大家熱悉的歌曲《閉目入神》、《晴天陰天雨天》，《我真的哭過》，真係聽出耳油呀！
Ronald除下外套，露出手臂紋身及雞翼袖背心，佢話：「我真係要讚自己，連續幾年都喺度同大家迎接新年，今次演唱會主題係dream、hope、love，講到夢想我哋有香港有好多，香港係福地乜都有，講夢想，而家60歲係中年，即係你第時老到攤喺度唔郁都有幾廿年發夢。」
至於新年希望，佢又搞笑話：「年頭見到古天樂，佢內心掙扎夠竟唱唔唱歌，出唔出碟，點知一出嚟就攞我最喜愛的男歌手，其實我同佢情況都好似，令我都信心爆棚，不久將來就應該輪到我。」
Ronald話：「其實香港有唔少問題，講貼身啲嘅愛情問題，好多後生仔拍拖擔心無樓唔結婚，於是就唔拍拖，變咗好多人單身，亦出現好多一人套餐、一人聖誕大餐、一人單位。我哋演唱會今次都特登推出單丁位賣，係最快賣晒，呢班單身人士一陣點歌環節我會特別照顧佢哋。」
三代同堂演出
鄭中基今次特別安排咗三代同堂演出，大女Emma親自揀咗首《A Million Dreams》唱足全首歌，Ronald嘅爸爸鄭東漢就負責彈結他伴奏，唱到中段Ronald才加入合唱，Emma表現全無怯場，好叻女。唱畢Emma更向觀眾拜年：「新年快樂，豬年身體健康。」在旁的Ronald笑話:「佢喺屋企講英文，所以呢幾句都練咗好耐㗎喇！」
Emma演出成功，鄭中基同鄭爸爸都有同佢擊掌打氣！
三代同堂表演，真係睇相都覺得好溫馨！
夢想揸的士
唱完《龍咁威》後，Ronald跟觀眾分享他的夢想，佢話自己嘅夢想係隨電影電視改變，細細個想做占士邦，後來又想做的士司機：「做占士邦有車揸又多女，我覺得最近似就係揸的士，因為我屋企都有鏡嘅，我咁嘅樣點做占士邦？做的士司機一樣有車揸，的士台大把女，有時同行家爭客仲會有飛車場面。」
想做「神之手」
Ronald講完童年夢，又笑話男士嘅夢想都係想做「神之手」加藤鷹：「佢一指會令人尖叫，會令人興奮。其實我都得，我上次握手，有啲位握唔到，但佢一指上去，就已經有人叫到飛起，所以加藤鷹最多令2個人一齊尖叫興奮，但我依家一指可以令萬人尖叫到飛起，我哋試吓！」全場歌迷立即大叫。
狂碌人情卡
演唱會邀請到陳明憙(Jocelyn)每晚擔任嘉賓，Ronald坦言在新春期間請嘉賓唔易：「過年好多人都出埠，好在幾經辛苦都請到，大家唔使擔心！」
叫歌迷派利是
Ronald個唱喺農曆新年期間舉行，佢喺台上搞笑叫大家派利是畀佢，又提醒歌迷記得帶錢，事關場外有好多紀念品賣。
Ronald於兩年前舉辦《Play It Again》演唱會後，曾經為電影增重至168磅，現在為開騷又進行地獄式減肥，成功減至138磅！
延伸閱讀：
農曆年開騷 鄭中基全家出動打流感針
近日流感肆虐，咪話小朋友易中招，大人一唔小心都被傳染，手尾極長，農曆年舉行演唱會的鄭中基(Ronald)，做足預防措施，早前一家四口出動去打流感針。
曾經掛住媾女自嘲係無賴的鄭中基，自從11年被前有線主播余思敏降服，簡直脫胎換骨由無賴轉化成「廿四孝」愛妻號，一對寶貝仔女出世後更加變深閨，幾乎絕跡社交活動，收工第一時間撲返屋企做住家男。
據知情者透露 :「識咗Sammie(余思敏)之後 ，Ronald 簡直變咗另一個人，唔再貪玩成個踏實晒，應酬活動更加唔願去，寧願留喺屋企陪仔女玩，佢完全畀對仔女融化咗，對住佢哋好滿足，全日對住對仔女都得。」
知情者續指：「咪睇佢以前成日掛住玩，做 咗爸爸之後，佢乜都仔女行先，又錫老婆，唔會將湊仔責任推晒畀太太，成 日都會話太太為佢付出咗好多，真係估唔到佢可以咁黐家!」
鄭中基公開感激太太
賢慧的余思敏，除咗能夠綁住太子基，更深得老爺奶奶歡心，將一對仔女教得精乖伶俐，Sammie功勞可不小。去年《 play it again》演唱會澳門站，鄭中基就在台上感激太太說:「佢為我增加咗兩個心愛嘅人，以前我從冇 諗過生小朋友，我係浪子，點會左拉右拖，不過做咗爸爸，成日會同導演講要開早啲，等我早啲收工返屋企陪細路!」
鄭中基全家出動打流感針
愛妻好爸爸當然唔係得個講字，近日流感肆虐，為免小朋友中招患病，加上自己快將開演唱會，向來緊張一對仔女健康的他，日前便全家出動去中環診所打流感針，當日早上約11時許，鄭中基一家由司機接載去到中環皇后大道中，司機停低車後，女兒Emma率先落車，跟住落車的Ronald一邊 拖個仔Evan落車，另一隻手仲會捉實個女，絕不掉以輕心！
打完流感針，一家人轉場去餐廳食飯家庭樂，不過，臨上樓前煙 癮起的鄭中基，就先吩咐太太同仔女上樓先，自己則企街食支煙，識得為家人設想，唔要仔女陪佢食二手煙，的確係盡責好爸爸!
為怕診所多細菌，兩公婆亦幫一對寶貝仔女戴上口罩做足安全措施，睇醫生近一小時，兩公婆一人拖一個落樓行去上車，見一對仔女打完針完全冇扭計，再轉場去開餐家庭樂獎勵一對寶貝!
思敏對一對仔女教導有方，拖著兒子行 的她，亦教導兒子同記者講唔該，女兒上 車後還同記者揮手講拜拜，精乖可愛!
