39歲黎諾懿留家抗疫做一家之「煮」囝囝停課做陪玩老豆勁充實

Mar 13 2020

廣告

呢個春天，話題離不開抗疫，小朋友無喇喇多咗三個月假期，又唔去得街又唔約得朋友玩，日日屈喺屋企好易吽出菇㗎嘛，所以點同小朋友放電，停課不停學真係好考父母功力，不過黎諾懿完全唔覺得煩惱，仲好enjoy咁添！

撰文、圖片：東方新地

黎諾懿享受做囝囝陪玩

有 follow開黎諾懿IG又係囝囝小春雞fans嘅就實留意到，黎諾懿日日陪小春雞玩遊戲、睇卡通、唱歌仔、講故事，停課日子不知幾充實。家庭幸福事業又穩步上揚，今年黎諾懿又撈多一瓣下廚搞飲食，繼新年煮完自家品牌年糕後，留家抗疫正好多咗時間精力露一手，日日都分享好味考功夫家常小菜，有姿勢有實際睇落都幾得㗎！

全港學生停課，黎諾懿惟有同個仔自娛，佢話小春雞玩水壺可以玩足一日。

見到IG日日更新，因為多咗好多時間同小春雞喺屋企搵娛企搵娛樂，一時齊齊玩玩具，一時無聊玩變臉Apps過日辰。

黎諾懿唔止識蒸糕，日前上載製成品臘味飯仲有蠔餅，賣相吸引！

夫婦親自買餸超nice揮手

呢日就見一家之「煮」黎諾懿又落九龍城買餸，帶埋老婆揸埋車由街頭行到街尾，睇個勢買齊幾日份量兩公婆至心滿意足上車離開。啱喇，買多啲儲備夠煮幾日，咁就可以慳番啲時間留喺屋企陪小春雞，仲可以出吓力乘機同老婆再追多個㖭！

年頭蒸糕露一手，至知黎諾懿演得、主持得、仲煮得！日前呢位一家之「煮」就驅車去九龍城街市入貨。

兩公婆由街頭行到街尾，分幾轉至買齊瓜果肉菜同日用品，夾手夾腳抬上車。

同行仲有老婆李潔瑩，兩公婆都nice到爆，見到八姨太即笑笑口主動揮手打招呼。

有老婆做司機，黎諾懿印印腳返歸。

關鍵詞