有片！黃子華澄清為拍港產片賣樓、自資、無片酬！「《乜代宗師》只想拍畀香港人睇」

圖文：東方新地

拍片澄清：《乜代宗師》只想拍畀香港人睇

相比去年收4,470 萬的賀歲冠軍《棟篤特工》，今次子華神包辦《乜代宗師》編導演員一腳踢博到盡！他在1月12日發布的影片，就作以下幾點澄清。
「呢部戲完全只係想拍畀香港人睇，一套香港嘅電影。點解要唔揀合拍片，因為我係想自由自在拍戲，無論題材、表達手法，我唔想有人去 censor 我。」

回應剝削指控：賣樓湊數無收片酬

對於有新聞質疑佢收百萬片酬，剝削其他人，子華講笑話的確有「剝削」台前幕後的工作人員，「係求所有人收平一啲」，佢強調自己唔單止一毫子都無收，實情係賣埋層樓拍呢套戲！講到咁慳家，原來因為呢套並係合拍片－－「呢套戲並非合拍片，呢個一開始嘅心態，呢套戲完全只是想拍畀香港人睇、一套香港嘅電影。點解要唔揀合拍片，因為我係想自由自在拍戲，無論題材、表達手法，我唔想有人去 censor 我，應該點樣點樣拍，想自由自在忠於我嘅 concept 拍出嚟。」

賣樓翻本無望 勝在唔係合拍更多自主

子華在接近6分鐘的澄清影片中強調，電影係100% Made in Hong Kong「《乜代宗師》係香港人投資、香港人賣樓，拍一套剩係畀香港人睇嘅戲。」

曾經拍過《一蚊雞保鑣》蝕錢收場的黃子華，其實對電影翻本並無信心：「今次其實係輸少當贏…以我套戲嘅 budget，係無可能返本，我甚至無諗過層樓可以賺得返嚟，但有無可能得返間房、或者一格廁所呢？就算只係返到個水龍頭，我都係預咗，但我可以自由自在拍。」

回應深圳取景 只為慳錢爭取更多工作天

子華進一步解說點解要返深圳取景：「我問過好熟行嘅監制，我賣咗樓，在香港可以拍幾多日？佢話 15 日，但我套戲需要 50 日。如果要喺香港拍，我唔單止要賣呢個單位，仲要賣我住緊個單位、賣埋我阿媽層樓，呀唔係，佢係租嘅……全行都認為我呢個傻佬，賣咗層樓，90 幾% 無得翻盤，我希望講返真實情況畀大家聽，睇唔睇，唔係好緊要。」

網友熱烈回應：賣樓為夢想，一定捧場

對於子華的辛酸自白，網友普遍收貨，仲講到明一定入場：

「子華神放心，香港人會送個奇迹俾你架！」
「就算我冇時間睇 都會買張飛！」
「不嬲都唔睇賀歲片，今年一定睇你！」
「子華神放心，香港人會送個奇迹俾你架！」
「其實我好鐘意睇《一蚊雞保鏢》！」
「一定支持！不灰鞋，不灰鞋！」
「全香港都唔知有冇20個藝人夠膽出嚟咁講 黃子華你好嘢！」
「一世人，可以係混濁同偏見既世界，不顧一切咁忠於自己一次，仲有咩野比呢種傻更美麗嘅事？」
「我覺得子華要搵錢老早就返咗上大陸啦，加油子華神！」

相關文章：鼠年賀歲檔港產片，原來仲有呢套…..

黃子華回歸影壇相隔17年再自編自導自演

出名要求高的黃子華，每個作品都嘔心瀝血，試過閉關創作搞到壓力爆煲，去年完成的《金盆𠺘口》棟篤笑封咪作，籌備足足四年先肯放上舞台，今年子華神更食住去年《棟篤特工》勁收4,470萬再戰賀歲電影檔，更是相隔十七年，繼02年《一蚊雞保鑣》後再次自編自導自演之作。據知情者透露：「喺創作《金盆𠺘口》時，佢收埋自己完全唔見人，好似跌咗落深淵咁，嗰刻佢真係諗過，完成演出之後，畀自己放一個悠長假期，可能會三幾年之後先會再有大Project，不過，休息一排靜極思動，好多構思湧出嚟！佢先決定再出關拍賀歲片！」

子華神力求完美 編導演員一腳踢

因為要趕賀歲檔，加上子華力求完美，拍完唔滿意會大刀剪走，近日仍在趕拍煞科戲，製作相當嚴謹。日前，子華神同心悠BB在尖沙咀街頭拍外景，擔任編導演員一腳踢的子華神，在拍攝現場同攝製隊密斟，拍攝每個鏡頭都親自打點一切，落場演出前自己睇好晒位，演完又負責睇 play back，分身做多個崗位，難怪一直眉頭緊鎖，就算女神心悠 BB興高采烈同工作人員及蝦頭傾到興起，路過身旁的他都完全冇插嘴， 更突然谷起泡腮賣萌，相信腦內仍不斷盤算下一場演出同製作構思！

回春有術59歲仍狀態大勇連場激戰唔同用替身

相比上年套賀歲片王《棟篤特工》，今次在《乜代宗師》中，子華神 要演馬家雷拳十九代傳人，因為有唔少動作場面，同西洋女拳手心悠有 連場激戰，特訓女神之外，自己亦準備充足應付動作演出，下年就登六的他，冇見一排鋼條身形變得飽滿，現場所見，為電影染回黑髪的他，一身格仔恤衫加西裝，造型驟眼睇似足《男親女愛》個抵死師爺余樂天，相距十九年還原余樂天，認真回春有術，因為試過埋首創作搞到壓力爆煲，近年他相當注重健康，一得閒便會行山跑步操fit，日子有功練出鋼條身形，而去年七月完成《金盆𠺘口》閉關休息大半年先再投入新工作，今次拍攝新片的確狀態大勇！