高海寧楊明新劇《迷網》劇情老土膠味濃玩廣場跳大媽舞

Jul 9 2020

正所謂騙徒手法層出不窮，教精市民誤墮騙局匹夫有責，所以政府年中拍唔少宣傳片教育大眾，家陣連電視台都配合網絡時代，新劇《迷網》前名《網絡騙案》，顧名思義就係透過戲劇專門拆解各類網上騙案。用意當然係好啦，不過鐵定於下周一（20日）播出、宣傳短片都出街後，睇埋個卡士高海寧搭楊明毫無新鮮感，個 trailer 風格仲係玩緊《廿二世紀殺人網絡》，嗰種懶係高科技視覺設計話晒都已經過咗時成廿年，好多網民都話望落有啲膠味喎！

撰文、圖片：東方新地

宣傳片抄襲西片《LUCY: 超能煞姬》

TVB為劇集《迷網》拍攝的宣傳片，其中一個以資訊泛濫作主題的片段，跟2014年Scarlett Johansson主演的《LUCY: 超能煞姬》其中一幕撞晒橋：

高海寧楊明新劇《迷網》劇情老土膠味濃

上位前試過醉駕又試過刑毀，曾經嘅壞孩子楊明近年努力洗底，仲變咗 TVB 專屬警方代言人，拍過多套警匪片，啱啱嘅《機場特警》至播完，呢套又扮網路安全及科技罪案調查科高級督察，同飾演婚禮統籌師嘅高海寧曾經係一對。分手後楊明同部門新人陳曉華邊辦案邊過電談情，而前度高海寧就同老公黃祥興感情變淡關係破裂，而唔覺唔覺又同楊明翻撻，劇情似曾相識！

繼《婚姻合伙人》同《單戀雙城》後，高海寧、楊明喺新劇《迷網》中又再飾演一對，零新鮮感。

歷年拍過無數警匪片橫跨警隊多個部門，楊明上月至扮完機場特警，今次又嚟網路安全及科技罪案調查科，並拍住下屬陳曉華查案。

同楊明分手後與黃祥興結婚，不過夫妻感情觸礁嘅高 Ling 誤墮騙局，輾轉又再遇上楊明藕斷絲連。

莊思敏喺劇中既是高 Ling老友，又係黃祥興嘅工作夥伴，仲疑似同祥興發展婚外情。

老戲骨馬海倫飾演廣場舞大媽，孖飾演佢老公嘅姜大衛落場展身手，呢日巧遇楊明同高 Ling 齊齊跳大媽舞。

新面孔多港姐冠軍陳曉華、縮水「廖碧兒」有份

劇情不外乎談情說愛加查案，又係一貫 BBQ 大結局！其實楊明、高 Ling 都係靚仔靚女，備受力捧上位係真嘅，不過只靠佢兩個夠唔夠班擔起大旗，就真係見仁見智喇！除咗兩位男女主角同姜大衛馬海倫呢啲老戲骨，其他就多數係新面孔，留意番，近年難得高質有觀眾緣嘅2018年港姐冠軍陳曉華亦有份參演，係佢處女作之餘仲擔正第二女主角，劇中更向朱敏瀚獻出熒幕初吻，都叫做係呢套劇賣點之一啦！仲有縮水「廖碧兒」葉蒨文、因為《愛 ‧ 回家之開心速遞》上晒位嘅張詩欣同IG吊帶王利穎怡咁多嫩口省鏡小花，總算有點點安慰！