陳智燊、宋熙年溫馨四口之家曝光做KOL順手晒月租三萬豪宅

Sep 30 2020

廣告

BB 又來了！恭喜模範夫妻陳智燊 (Jason) 同宋熙年呢一對，16年結婚、18年產子，9月頭啱啱又咇多件，成功三年抱兩，可喜可賀！

撰文、圖片：東方新地

陳智燊、宋熙年溫馨四口之家曝光

婚前喺將軍澳租個幾百呎細單位，婚後 Jason 同宋熙年睇中馬鞍山，用近三萬月租租住過千呎豪宅，就算一家四口都夠住有凸！本來家居內籠好神秘，不過隨著兩公婆轉職做咗 KOL，又有埋大仔 Damon 晒仔成狂，經常喺屋企就地取材拍片 sell 貨，再加上親子互動令每個屋企角落都係父子倆遊戲間，咁就不經意將大屋布置間隔都曝埋光，目測布置簡單又溫馨、大廳闊落走廊又長又深、起碼三房間隔，兩公婆、Damon、工人姐姐各有一間房，啱啱好唔使爭！

上個月啱啱至同兩歲 Damon 慶祝完生日，今個月細佬 Jamie 剛剛出世，不過離陳智燊生四個目標仲爭一段距離！

婚前係電視台筍盤，婚後亦都愛家愛老婆 keep 住最佳狀態接 job 養家，Jason搞鬼舉啞鈴相背後，可見兩歲人仔 Damon嘅大作已經掛滿大廳。

婚前係電視台筍盤，婚後亦都愛家愛老婆 keep 住最佳狀態接 job 養家，Jason搞鬼舉啞鈴相背後，可見兩歲人仔 Damon嘅大作已經掛滿大廳。

小朋友事情唔止媽媽一個上心，暖男 Jason 除了幫手餵奶分擔家務外，早前透露用盡方法令抗拒口罩嘅 Damon 習慣戴口罩，終於成功氹掂小 Damon 一家人即時影相留念。

早在英國共同置業香港只租不買

一家四口加埋工人姐姐就話啱啱好，不過陳智燊一早揚言要跟自己屋企大家庭一樣，生夠四個至收手，相信宋熙年個肚有排都未收得工呢！其實18年先後離巢成為全職 KOL，兩公婆口齒伶俐形象討好大受品牌歡迎，高峰期一個月搵超過六十萬收入，一心組成大家庭、又正值事業搏殺期，一千呎邊夠住呀？原來兩公婆一早喺英國共同置業，終究會返 Jason 長大嘅英國養育兒女，所以有共識只喺香港租樓唔會置業，因此見到陳家裝修基本陳設簡單，完全唔覺得出奇！

抗疫期間加上媽媽安胎最緊要安全，幾個月來Damon冇得去公園，家中大廳就劃出專屬安全又舒適嘅遊戲區，爸爸媽媽輪流陪玩。

陪囝囝放電，反而搞到自己冇晒電！

陳氏伉儷形象討好成為各大家居品牌紅人，sell貨之餘，都可見千呎家居四正又實用，最少有三房，長廊行到尾係主人房，夠闊落又光猛。

呢一代港爸港媽提倡玩樂中學習亦都不能扼殺孩子創意，所以大廳地板變咗Damon畫板任畫唔嬲。

邊畫邊認動物同生字自然學得快又記得更生動，最緊要全程有爸爸陪玩陪學。

為新成員布置育嬰室又可以順手介紹吓代言產品，亦可見房簡潔光猛仲大把空間。

年初城中鬧廁紙荒，負責採購日用品嘅Jason感慨唔夠師奶大媽搶，不過網民焦點就放晒喺個廁所裝修又大又豪華。

關鍵詞

陳智燊宋熙年