陳慧琳指做到歌手全靠鄧建明 JoeyTang開騷李克勤、鄭中基爆《紅日》秘密

撰文、圖片：東方新地

陳慧琳試音驚到震 得Joey肯定成天后

當晚Joey以一身黑皮褸造型登場，邊彈結他邊唱〈拼命三郎〉、〈頂天立地〉等經典歌為演唱會揭開序幕。早前因為牙痛而接受口腔手術，Joey自誇手術後面形變尖，靚仔咗再加上做運動健身，成個人fit晒，所以全晚換足十支結他邊彈邊唱都冇索氣！

著黑色透視長裙嘅陳慧琳提到Joey係佢入行第一位接觸嘅音樂人，全靠對方佢先可以通過試音成為歌手，Kelly表示：「如果當日唔係Joey哥喺我試音時話OK，我今日都唔會企喺度。」Joey笑言當年早知Kelly係可造之才，Kelly搞笑話：「早講吖嘛，我當時好驚，見佢外形好cool，以為佢好惡㖭！」

孖李克勤唱〈紅日〉 鄭中基爆小秘密

其後到李克勤登場，克勤孖Joey唱出〈紅日〉，Joey話對呢首歌有情意結：「為咗呢首歌，我第一次好認真咁入錄音室錄歌，負責彈同埋做和音㗎！」另蘇永康又大讚Joey係一個 EQ好高嘅監製，無論自己或者Big4開演唱會都會搵對方做音樂總監：「Joey脾氣好，係真心為歌手好，樂壇有佢係福氣。」成晚嘉賓輪住上台，足見JoeyTang嘅人緣極佳。