羅力威趁老婆大肚大膽起雙飛！雨僑懶理IG晒超靚孕照

撰文：東方新地、圖片：東方新地/IG

羅力威連出兩首新歌

羅力威今次推出兩首風格截然不同嘅新歌〈 旅行娃娃 〉及〈 廢物女友 〉，兩首歌同樣由佢親自作曲。〈 旅行娃娃 〉歌詞講述男主角雖然唔捨得女友獨自遠行，但最後都尊重女友想法，並以「 旅行娃娃 」代替自己陪伴對方到處闖蕩。被問到會否讓老婆獨自遠行，羅力威認為一齊去旅行先開心：「 如果撇低另一半好冇意思，雖然仲有啲貓陪住，但係喺屋企想睇吓電視、食吓嘢都冇人陪，好空虛，真係會好掛住對方。我哋去親旅行都係一齊去，因為我哋覺得永遠都係一齊去先最開心。」

雨僑IG晒超靚孕照

而另一首〈 廢物女友 〉節奏較輕快，內容則講述對方將自己最單純、最真實、最直接嘅一面展示於另一半前，而並非鬧對方係廢物。講到雨僑嘅「 廢物 」一面，羅力威笑老婆欠缺生活小智慧：「 佢喺好多事情上都好聰明，但就欠缺日常小智慧，可能就係自己照顧得自己唔太好。我喺呢方面比較優勝，譬如佢會成日唔記得嘢、會撈亂嘢、唔見嘢，我通常會幫佢搵番晒啲嘢出嚟。」夫妻之間從來都係一凹一凸互補不足，咁至係 perfect match 㗎！

另一方面，懷孕已經7個月嘅雨僑近日就喺IG大晒超靚孕照。佢仲留言話感受到BB嘅重量，無論疲倦定精神都有BB陪住，覺得係一段好美好嘅時光。真係隔住個mon都feel到有幾幸福！