43歲謝安琪慾照私影誘夫 結婚13年同張繼聰重拾激情

撰文、圖片：東方新地

謝安琪閂埋房門玩私影張繼聰做御用攝影師

謝安琪07年與張繼聰奉子成婚，兒子張瞻出世後，其歌唱事業更暢旺，升呢後被指與張繼聰女尊男卑，不過無損夫妻感情，近年張繼聰崛起，拍劇拍電影成為大紅人，07年再迎來細女張靖，一家四口生活更見美滿。最近受到新冠肺炎影響，居於大埔比華利山的張繼聰與謝安琪亦留家抗疫，不時在社交網上看到他們與子女打成一片，張繼聰幾乎每天都揸住結他自彈，謝安琪又會興起開金口，但原來除了玩音樂，夫婦二人近月有另一愛好。

張繼聰早前宣布即將踩過界做網紅，喜歡影相拍片的他，最新愛好是做謝安琪的御用攝影師，間中也會把作品放於自己的 IG內，日前他又親自操刀拍下謝安琪的出水芙蓉照，張繼聰直頭當寫真咁影，據知情者透露：「雖然生咗兩個小朋友，但 Kay（謝安琪）好引以為傲，覺得自己身材仲 keep到冇走樣，再加上有個鍾意影相嘅老公梗係要用到盡啦！

阿聰影得 Kay唔靚唔瘦一定畀佢鬧爆，為咗增添夫妻情趣，佢哋仲會喺屋企睡房閂埋門影性感相，不過都只係自己私藏，呢輯泳池相影到好似日本少女寫真咁，其中一張仲係 Kay大髀大特寫，真係引人遐想，阿聰唔想益街坊，所以冇放喺自己 IG度，點知 Kay自己放，即刻惹來好大回響。一直以嚟，Kay好介意人哋話佢老過阿聰，所以喺老公面前佢成日扮少女同小鳥依人，結婚十三年老夫老妻，都要諗吓點樣重拾激情嘅！為咗冧老公姣功係必須的，呢方面 Kay做得好好，夫妻生活真係一啲問題都冇。」

努力經營夫妻關係 烈火戰車慢速行駛

謝安琪深知夫妻關係要努力經營，在這段抗疫期間，除了要全天候照顧一對寶貝仔女，她亦沒有冷落老公，不時陪住張繼聰外出飛車，知情者說：「阿聰熱愛揸電單車，近年花唔少錢買戰車，Kay唔單止冇詐型，仲讚老公夠man夠型，呢啲老婆去邊度搵呀？」冬天坐電單車寒風刺骨、大熱天時又曬又焗，相信冇乜女士喜歡坐電單車，不過謝安琪為冧老公奉陪到底。

日前下午三時左右，張繼聰駕駛其新寵Harley Davidson FatBoy戰車外出，由大埔比華利山出發前往沙頭角鹿頸，來回花了約一小時，返家後他再次出車，這次後座多了老婆謝安琪，夫婦二人同穿黑皮褸、窄牛與短靴，打扮襯到絕，雖然其電單車馬力非常大，但張繼聰全程時速都不過60，車載愛妻小心為上，而今次目的地同樣是鹿頸，一日出車走兩轉都冇停車落地，可見張繼聰留家太悶，無論如何都要外出快閃鬆一鬆，而謝安琪亦夫唱婦隨。

簽了Juno公司的謝安琪，原打算每年12月12日推出新碟，今年受疫情影響令工作計劃大亂，之前傾落的廣告延期，新碟錄音日前才重新開始，外地的巡迴演唱會更暫時擱置，至於張繼聰電影工作也大受影響，惟有耐心等候，這段停工期一家四口在家困獸鬥，無論親子關係抑或夫妻關係，都一定更勝從前。