袁偉豪孖周柏豪型男鬥「肌」 港版《人在野》有樣有Body
撰文、圖片：東方新地
袁偉豪孖周柏豪型男鬥「肌」
最近兩兄弟又拍住上為無綫拍攝節目《兩個小生去Camping 》，走入偏僻叢林大玩野外露營，要攀山涉水過程艱辛。之不過對觀眾而言就爽啦，皆因呢個雙豪組合出名有樣有 body，當型男遇上型男，畫面 very「 肌 」！
袁偉豪同周柏豪拍攝呢個野外節目，既要上山又要下海兼玩滑翔傘，體能需求好大，相當辛苦，袁偉豪笑言十足人在野一樣：「呢個節目主要係講野外露營，會提及露營發燒友玩意，亦會介紹一啲香港郊外紮營嘅好地方，我同柏豪都會喺野外煮食。」初嘗風箏滑浪嘅Ben喺拍攝期間，仲唔小心撞親尾龍骨呀陰功！至於柏豪則視今次拍攝過程為新挑戰，更形容自己拍到由白皮豬變黑炭頭㖭！好彩兩兄弟平日都有運動操開，15日旅程一定捱得過！
回帶：袁偉豪《YES!》校草真身曝光！那些年維他奶仔變型男
中學時期嘅袁偉豪，原來曾經參加校草選舉，當年嘅小鮮肉已變Man爆小生，不得不講句仔大十八變！
袁偉豪選港男入行
想當年，有「維他奶仔」之稱嘅袁偉豪參選香港先生大熱勝出。2007年當選之後，拍過好多唔同嘅電視劇，可惜大部分都係啲二打六角色。
唔經唔覺袁偉豪已經入行22年，佢喺TVB都捱咗十多年，至成功坐正做男一。而在前年袁偉豪憑《棟仁的時光》先後贏得「馬來西亞最喜愛男主角」及「新加坡最喜愛男主角」，成為雙料視帝，成功揮低對手陳展鵬、王浩信及馬國明！
袁偉豪經過11年的努力，憑《棟》中的打工仔角色成功入屋！
袁偉豪另一啲角色，如較早前《鐵馬戰車》入面嘅施馬Sir，以及《EU超時任務》嘅郭尚正都相當突出，努力係一定有回報的！
袁偉豪 那些年校草真身
回帶睇番97年，當時得15歲嘅袁偉豪喺新法書院就讀，當年佢參加咗《YES!》雜誌嘅校花校草選舉，之前佢就喺IG自爆陳年相，一睇真係不得了！見到佢一身黑色鬆身戰衣、三七分界、輕輕托腮加埋迷人嘅眼神…. 連佢自己都忍唔住留言︰「人哋話女大十八變！男其實咪係一樣」其實亮點又豈止袁偉豪，其實佢當年其他對手，小編都覺得好有「特色」…
有校草當然都有校花，袁偉豪旁邊嗰位就係當屆校花冠軍，見到兩人身穿校服擺個乖乖甫士，真係想唱番句「同學各位 找個位 這是你的開學禮…」唔知呢位那些年校花依家做緊咩呢？係咪一樣咁靚呢？
袁偉豪於1998年曾演出維他奶廣告與簽約力圖唱片，故他於參選港男時，一直被報刊傳媒稱呼為「維他奶仔」。
喺電影《新古惑仔之少年激鬥篇》中，謝霆鋒飾演「少年陳浩南」，分別由李燦林飾演少年「山雞」、袁偉豪飾演少年「巢皮」，以及余家豪飾演少年「包皮」，但獨欠少年「大天二」。
之前有忠實fans找到袁偉豪入行拍嘅第一個廣告，真係好珍貴！
試問人誰無過… 過去個過呀！最緊要係紀念曾經這麼青春過嘛！睇完毒J版本袁偉豪，不如睇番佢嘅型仔相啦～
