台藝人納豆教你追女三招 158cm身高一樣追到長腿女神！

撰文：東方新地｜圖片：Instagram、Facebook

台藝人納豆158cm身高唔係問題

細細粒的台灣著名節目主持納豆，老老豆豆確係其貌不揚，而且158cm身高又真係比較蝕底。可能唔少人都以為佢愛情路一定好坎坷，但事實係佢啲女友個個高質，現任女友為被封「國光女神」的陳依依！究竟佢有冇秘訣教教小編呢？

納豆教你追女三招

｜內涵重要過外表

納豆接受傳媒時曾表示，將自己變成一個有趣的人係非常重要的！雖然話靚仔有外表上的優勢，但講到長期作戰，就一定要著重內涵。納豆建議男士們要睇多啲書，增廣見聞，充實自己，唔好徒具外表！

｜識睇人眉頭眼額

納豆又稱，好多時男仔追女仔時都係死纏爛打，或者好刻意咁去製造浪漫，但如果時機不對，咁就只係浪費時間同金錢！納豆追女仔時最擅於鑑貌辨色，觀察對方微小動作眼神，推測對方所想。並要懂得喺女仔最有需要、或者心情唔好的時候登場。不過小編認為：「唔係咁易㗎，納豆師傅！」

｜幽默感加分

超強幽默感可謂納豆的必殺武器，其實亦係令一個男仔加分的地方，令女仔同你相處時感到快樂自在，好感度自然瞬間提升。雖然經常有網民問佢「對身高感到自卑」、「女友比自己高怎麼辦」，但納豆鼓勵大家「濃縮的才是精華」、「底盤低的都是超跑」，叫大家放膽去追女神！

現任女友陳依依

講咗咁耐納豆點追女神，咁到底有幾女神先？介紹番納豆現任女友陳依依，1992年出生的依依，擁有32E豐滿上圍、無敵長腿，仲係畢業於中山醫藥大學的高材生！

「國光女神」

陳依依讀大學期間，趁暑假參加錄影工作，之後誤打誤撞被睇中加入演藝圈。依依後來擔任《國光幫幫忙》助理主持人，故被封為「國光女神」！

前度女友一樣咁正

之後睇埋納豆前度女友，台妹林又千同樣係1992年出世，又係樣靚身材正，不過現時已經退出娛樂圈。

唔知係咪學到納豆嗰三招，小編都可以追到女神呢？