簡淑兒愈大愈靚六年進化史重溫

Feb 12 2018

女大十八變，即刻變靚又得，隔返幾年先至變靚亦得，得咗！講緊嘅係呢期人氣急升嘅簡淑兒，佢之前喺大台劇《迷》扮田蕊妮女兒，學生妹look又pure又true，喺《平安谷》又有不俗發揮，依家新劇《波士早晨》又見到佢！但唔講唔知，簡淑兒其實12年美國回流選港姐，但因其貌不揚頭圈已經被淘汰。不過今時今日鼻又高咗、眼又大咗、面又尖咗、連人都後生埋，以一對腰果笑眼榮升新一代女神，劇接劇前途無限。所以話變變變生命力，真係好神奇呀！

簡淑兒《平安谷》演淼淼

無綫劇《平安谷之詭谷傳說》，觀眾口碑出乎意料地好，一班女演員的演出備受讚賞，其中簡淑兒飾演一個天真可愛的小女孩淼淼，不過就有個獸父鄭子誠，仲差啲被侵犯！紥一對孖辮、楚楚可憐的樣子，簡淑兒真係無得輸！

《波士早晨》又見到佢

接住《平安谷》出街的《波士早晨》，男主角方面有黃智賢、洪永城等，吸引力一般；反而女演員陣容更吸引！除了人見人愛的Ali李佳芯、好耐無拍無綫劇的陳慧珊外，觀眾在同一時間又見到簡淑兒！今次簡淑兒飾演一個初級秘書仔，怕怕醜又驚青咁，由佢演繹就適合不過！

簡淑兒：我以前只係黑同肥

講開28歲的簡淑兒，雖然佢出名樣子甜美，但其實整容傳聞由佢16年加入《愛回家之八時入席》出演秘書仔時就傳到㷫烚烚。當時簡淑兒經已反客為主，自post 11年回流前美國留學舊照，自嘲曾經又肥又黑、再自嘲EQ差、話傳媒專揀妝頭出事的相片對比，水蛇春咁長hashtags，曲線自辯係女大十八變唔係整容囉！

真面目判若兩人

對於簡淑兒的變臉疑雲，本刊曾獲得一批2012年香港小姐競選官方照，當年簡淑兒20強不入，一早做咗炮灰。係同屆黃心穎、朱千雪、湯洛雯等太高質，還是簡淑兒方面、細眼、扁鼻實力差太遠？雖然話女大十八變啫，點解事隔多年冇人話心穎BB同千雪BB唔同晒樣嘅？又點解可以變變吓變咗撞埋Baby樣呢？