盤點圈中十對出生入死好兄弟

撰文、圖片：東方新地

劉青雲 黎耀祥

本來係無綫電視營業部文員，1985年祥仔黎耀祥就係睇咗劉青雲做主角嘅招生廣告，因而動心決定報讀無綫演藝訓練課程。86年首次做電視劇《銀色旅途 》閒角咁啱遇上劉青雲做男主角，自此二人展開長達三十四年嘅友誼，年年都約埋拜年仲會兩家人一齊飯敍過生日。

鄭伊健 黎諾懿

05年拍攝電視劇 《隨時候命》成為羽 毛球波友，黎諾懿自爆於05至07年間自己最窮困，要住劏房、捱麵包，全靠伊健叫佢去屋企揀衫著見人，又會介紹佢畀相熟導演拍戲，至能夠解困。不過黎諾懿最終都成功報恩，因為佢介紹咗個好老婆蒙嘉慧畀鄭伊健，算唔話得！

周柏豪 袁偉豪

唔係走紅後入 TVB 至結識，周柏豪同袁偉豪原來早於入行前做 model 時已經係舊相識，柏豪自爆當年用 ICQ 主動結識袁偉豪，之後加入娛樂圈仲有問過袁偉豪經驗，家陣新婚嘅袁偉豪仲搬埋入同一屋苑，同柏豪一齊做鄰居。

林峯 吳卓羲

林峯99年入讀藝員訓練班，同遲佢一屆嘅吳卓羲喺電視劇《 大唐雙龍傳 》中碰頭，並一齊走紅、一齊被無綫力捧、一齊長大再一齊離巢外闖。兩人friend 到互相有屋企鎖匙，林峯仲會親自改裝私家版風扇做禮物，買底褲又會買埋兄弟嗰條，仲話一日一個電話好黐纏。

陳奕迅 謝霆鋒

同期出道，又曾經同屬一間唱片公司，陳奕迅、謝霆鋒識於微時，共同經歷過風風雨雨。當紅時已經會結伴傾偈賞月傾天光，謝霆鋒更話過，陳奕迅係唯一一個唔可以幫佢生仔，但會為佢赴湯蹈火嘅人。

梁朝偉 杜德偉

85年參加新秀歌唱大賽入行，杜德偉即與同期剛剛喺電視圈起步嘅梁朝偉結為好友，仲有呂方、鍾鎮濤等大班老死一齊玩大蒲大，個個如今年過五十都定期聚會，彼此開騷、出碟、電影上畫必定到場支持。杜德偉12年娶老婆，梁朝偉都畀面做兄弟團㗎！

古天樂 鄧一君

97年加入電視台冇耐嘅鄧一君，因為拍攝《 美味天王 》同古天樂成為好友，其後更五度合作友情愈嚟愈深厚。鄧一君05年離開娛樂圈，轉行擔任理財顧問，多得老友古仔幫襯，之後開士多賣車仔麵，都有古仔花到人又到。今年開拍電影版《 尋秦記 》古天樂只係開句聲，鄧一君就即刻出山順手過戲癮。

苗僑偉 黃日華

三哥苗僑偉早前接受崔建邦、張秀文主持嘅節目《諸朋好友》 訪問，被問到會帶邊個朋友上嚟，三哥只講咗兩 個字 「黃華」 。三哥同華哥同屬第九屆藝員訓練班，畢 業後同被力捧、同步走紅，一樣喺電視台搵到愛妻，一樣都係老婆奴女奴，四十年來一齊走過高山低谷，華哥仲剖白最近經歷喪妻之痛都係全靠三哥陪伴度過。

張繼聰 張振朗

33歲張振朗明明同40歲張繼聰，無論背景、年齡都有段距離，不過就因為玩復古電單車啱嘴形而相逢恨晚，除咗會約埋一齊玩，仲一齊揸古董電單車遊車河，張振朗女友楊偲泳離巢過檔古天樂旗下，有傳都係張振朗託張繼聰幫手搭路。

蕭正楠 黃祥興

蕭正楠同黃翠如18年4月秘密結婚，不過同年3月已經被黃祥興一個唔小心，喺節目《 1＋1的深情 》爆響口，天大秘密得黃祥興知情，點會唔係老死？原來蕭正楠08年加入 TVB 已經認識黃祥興，基本上一齊長大。