29歲王卓淇與吳業坤分手四年洩蜜 黑底誘惑擋唔住坤哥搭訕調戲
撰文、圖片：東方新地
王卓淇有自信 露肉吸客成功
擁有甜美外表加埋一雙白滑長腿的14年亞軍港姐王卓淇，似乎對自己身材信心爆棚，近幾個月就經常在個人社交網晒肉照派福利，除剩Bra 及底底影勻家中每一角落，趷籮、谷胸露背玩盡誘人甫士，對一雙誘人43吋長腿自得其樂，近期更玩埋腳趾誘惑，搞到被戀趾狂騷擾一樣不以為意，還得戚自爆狂迷想出錢買她的腳趾片，極度享受被另類關注，不但未有封鎖對方帳戶，更cap圖在限時發布上po出來，叫對方繼續留意自己的社交網，表示不用畀錢都定會有驚喜。
與吳業坤分手四年嫌對方太多緋聞
入行六年，演技幼嫩拍劇冇回報，反而露肉吸客成功，其個人IG已突破20萬追隨者，就連同她傳過緋聞，有偽毒男之稱的坤哥亦熱烈追捧，不時在Erin社交網精警留言調戲，可見兩人分手仍保持友好關係。出名口甜舌滑的坤哥，15年同王卓淇合拍J2台節目《安樂蝸》，已火速媾掂長腿女神，不過，16年王卓淇就喊爆哭訴，指被第三者撬牆腳而戀情告終，之後又自爆有富二代新歡，不過近年少有提及戀事的她，近期又因露底派福利令昔日已經常大讚Erin一雙美腿的坤哥再次動情，公然在社交網出言調戲女方，直問Erin穿著的是不是底褲？相當曖昧。
據知情者透露：「 16年分手嗰陣，其實Erin對坤哥仲好留戀，坤哥把口𠺘過油，好快已經氹番Erin，不過拖拉咗一段時間，Erin始終忍受唔到坤哥身邊咁多女，最後都係分手收場，之後佢哋一齊拍《飛虎之雷霆極戰》，又多咗見面，但兩個人嘅關係就好神秘！」成日畀人話識食嘅坤哥，43吋長腿加送億萬筍盤背景，當然識揀啦！
