溫碧霞相隔8年再出廣東歌為香港人打氣出動千朵花裙兼跳舞拍MV

May 21 2020

新任影后溫碧霞 (Irene) 憑英皇電影《墮落花》得到驕人成績，除入圍5個國際影展外，更勇奪「愛爾蘭第8屆絲綢之路國際電影節」《最佳女主角》，雖然《墮落花》因受疫情影響一再延期上映，不過近日終於落實於本月28日隆重開畫，對影迷嚟講簡直係一大喜訊！而溫碧霞除咗忙於宣傳月尾上映的《墮》片外，最近為向全港市民打氣發放正能量，相隔8年再度推出全新廣東歌〈 Make You Smile 〉，希望大家能抱有正面樂觀態度度過疫境難關，並定於5月20日「我愛你」浪漫日子首播。

撰文、圖片：東方新地

溫碧霞相隔8年再出廣東歌為香港人打氣

呢位充滿正能量嘅影后，為向全世界及醫護人員打氣，雖已有8年冇推出新歌，但近日再度執咪灌錄一首輕快嘅打氣歌〈 Make you Smile 〉，希望大家帶住微笑抗疫，一齊以笑容迎接更美好的明天。Irene 對新歌製作非常認真，日前專誠邀請排舞老師為歌曲排舞，Irene 開心表示：「已經排咗3堂，進展理想，其實我好鍾意跳舞，所以好投入，而且呢首歌唱得好開心，又跳得開心，之前都有唱過快歌〈森巴嘉年華〉及〈Stranger in the night〉都係跳舞歌，所以今次再跳番舞，感覺好正！」排舞老師更大讚 Irene 有跳舞天份，有節奏感又有美感！

溫碧霞再開金口灌錄抗疫打氣歌〈Make you Smile 〉，並專誠邀請排舞老師為新歌排舞。

Irene 曾經推出過8張個人唱片，繼2012年推出國語 EP《我愛的你不在身邊》後，一直專注電影工作，前年再復出歌壇假麥花臣場館舉行咗一場《溫碧霞海潮演唱會2018 》，歌唱經驗豐富。

憑英皇電影《墮落花》封后，其精湛演出毋庸置疑，現《墮落花》鐵定於本月28日上映，令人期待！

新片中Irene與陳漢娜一場sheshe情慾激吻戲，話題性十足，亦係Irene從影以來一大突破！

由李卓斌執導、伍健雄監製，溫碧霞、關智斌、艾迪、郭奕芯、陳漢娜、陳煒、沈卓盈、黃錦燊等主演嘅《墮落花》，自開拍以來備受各方注目，更獲世界各大影展高度重視，先後入圍5個國際影展，成績斐然！

MV出動千朵花裙兼挑戰跳舞

除了舞蹈，今次新歌 MV 更以充滿陽光氣息嘅夏日夢幻花花世界為主題，並由內地著名設計師 Tony 專誠為 Irene 設計造型，其中一襲充滿鮮艷色彩嘅花花裙，動用了一千三百多朵 Irene 最喜歡嘅牡丹、玫瑰、太陽花等絲花縫製而成，Irene解釋：「我好鍾意花，歌曲又喺夏天推出，好希望 MV 畫面畀到大家開心，呢段時間大家都好 sad，好想可以做啲嘢令大家開心！」一時間要搵成千朵絲花，Irene 竟然話 easy job：「因為設計師本身開花店，所以要搵千幾朵絲花完全無難度，反而最大問題係設計師本來要飛嚟香港為布景鋪滿鮮花變成花海，但因疫情被迫取消計劃，改用綠幕拍攝再做後期製作，效果都好特別。」Irene 希望鼓勵大家同佢一樣要樂觀面對疫境，相信明天會更好。