52歲江欣燕《十八年後》同黃智雯似姊妹 曾晚晚夜蒲離婚後重回正軌

撰文、圖片：東方新地

江欣燕《十八年後》同黃智雯似姊妹

現年52歲嘅江欣燕一向保養得宜，無論樣貌同身材都 keep 得好好，雖然佢喺劇中造型上都有花心思去扮熟婦，但拍埋黃智雯的確似兩姊妹多過母女，江欣燕坦言當初都有擔心過：「 出到嚟係好似兩姊妹，惟有用演技搭夠！不過計番真實年齡其實我都真係生得到佢，如果我18歲生嘅話！」唔係喎，黃智雯都37歲啦，除非江欣燕15歲未成年懷孕啫，喺合法情況下，點計都生唔出囉！

入行35年扮鬼扮馬形象深入民心

不過學江欣燕話齋，做戲係靠演技嘅，好似佢本人就係最佳例子！入行35年扮鬼扮馬形象深入民心，90年代一系列扮嘢搞笑節目如《 娛樂插班生 》、《 樂壇插班生 》等都必定有佢份。2001年同吳積遜結婚後而減少幕前工作，暫時息影。至2013年宣布離婚後，江欣燕又再度重出江湖，雖然佢嘅電視劇產量唔算多，但每次演出都獲得唔少讚賞，好似《 女人俱樂部 》、《 為食神探 》、《 逆緣 》都令觀眾留下深刻印象，一代扮嘢王並非浪得虛名㗎！