《機場特警》27歲朱敏瀚兩病纏身失角色 爆肌變man搏上位成功

撰文、圖片：東方新地

朱敏瀚兩病纏身失角色

17歲中學畢業後，朱敏瀚投考無綫藝員訓練班入行，對演戲有好大憧憬，可惜被斯文瘦弱外形局限，每每只被派演主角年輕版及做主角細佬角色，發揮機會不多，更曾因體弱多病而試過失去角色。17年正在趕拍劇集《是咁的，法官閣下》的他，同時兩病纏身，口水腺生石，以及扁桃腺發炎，因口水分泌不足不能吃飯，扁桃腺又經常發炎，每星期要打針消腫，令他拍劇時相當辛苦，拍完該劇即入院做手術，也因為手術後要休息，失去《包青天再起風雲》一個重要角色，令他相當失落。據知情者透露：「嗰時佢啱啱同公司申請調離《都市閒情》冇耐，唔做主持，都係為咗可以有多啲機會拍劇，點知又因為身體出事，要做兩個手術，令佢接拍唔到《包青天再起風雲》一個幾重戲份嘅角色，佢覺得自己好唔爭氣，嗰時好唔開心，朋友不停安慰佢，佢先收拾心情再等機會，好彩皇天不負有心人，佢之後有機會演出《好日子》及《 C9特工》，令佢明白人嘅際遇，有失亦會有得，最緊要先裝備好自己！」

操肌開竅成功上位 升呢做男三

不過其後接拍《 C9特工》，朱敏瀚劇中飾演馬明細佬，始終未能打破做主角細佬宿命，直至18年接拍劇集《機場特警》，朱敏瀚終於開竅，努力操肌洗走孱仔形象，拓闊戲路。據知情人士透露：「喺無綫十年，Brian（朱敏瀚）接親都係啲唔起眼角色，始終冇自己嘅Character，佢好唔甘心，解唔開心結都成日搵朋友呻，咁啱接到《機場特警》呢套劇，因為要做機場特警組隊員，要拍攝好多特訓場面，一定要保持高體能，瘦弱身形更加冇說服力，於是佢花咗幾個月時間操肌，更加練到開竅，明白要打破自己外形局限，先可以爭取更多機會，好積極做 Gym，最初靠自己練，後來搵埋教練幫手，一星期做 Gym做足五日，嫌自己太白唔夠Man，仲去曬埋太陽燈。」

觀眾眼前一亮，無綫一班監製亦對朱敏瀚改觀，爆肌終於令他有運行，去年連拍四劇，當中《反黑路人甲》、《踩過界 II 》都有不少發揮機會，據朱敏瀚好友透露：「最初操肌係想拓展戲路，都係諗住博一博，健身之後，發現身體健康咗，拍劇捱更抵夜都唔會咁易病，而且真係多咗好多演出機會，好似喺《反黑路人甲》，佢已經升呢做男三，監製仲安排佢有打拳戲，繼續騷肌，發揮機會多咗，佢覺得自己揀啱咗路，依家都繼續 keep住做 Gym。」

自小混血女生相 簡淑兒叫轉性

生得青靚白淨的朱敏翰，原來細個時候就生得一副混血女仔樣。早前Bryan 更在IG po出自己小時候的相，笑言自己應該去選港姐。老友張振朗和簡淑兒紛紛留言，叫Bryan現在去選港姐、可以轉性。