宅男女神何依婷扮「港女KOL」派綠帽畀楊明！《機場特警》結局周感情戲大逆轉

Apr 22 2020

現正於黃金時段播放嘅無綫劇集《機場特警》中有唔少靚女助陣，除咗蔡思貝、湯洛雯、鄧佩儀、孫慧雪之外，隨著《機場特警》進入結局周，扮演「絕世港女」KOL、同楊明發展感情線嘅何依婷又有新搞作，醉酒出軌搞大個肚，仲派埋綠帽畀楊明！

撰文、圖片：東方新地

因為同男友鬧交，出去開心返一晚，涼都唔沖就......點知「安安BB」真係有咗BB。 — 因為同男友鬧交，出去開心返一晚，涼都唔沖就……點知「安安BB」真係有咗BB。

何依婷做「絕世港女」KOL 《機場特警》結局周派綠帽畀楊明

《機場特警》索到爆的安安(何依婷飾）有波有長腿，迅即彈起成為新一代宅男女神，一向主持開兒童節目Think Big天地嘅佢，今次飾演壞女孩KOL依然有板有眼，同Easy哥（楊明）一段情都好引人入「性」，摸髀打茄輪好合拍，可惜早前安安因為著bikibi拍洗車片事宜同Easy吵大鑊，仲鬧分手，鏡頭一轉安安竟然有咗！恭喜Easy Sir做爸爸？仲即刻打鐵趁熱向安安求婚….

被派帽仲以為做老豆，楊明去咗觀塘碼頭約埋朋友部署求婚。 — 被派帽仲以為做老豆，楊明去咗觀塘碼頭，在眾友人見證下，Easy跪地向有餡安安求婚。何依婷黑曬口面的演出十分到位。

落Bar劈酒經手人唔係楊明

可惜安安同許志安一樣算係「壞咗嘅人」，同Easy分手後，安安落bar劈酒，遇著final boss宋天機（許家傑飾）條𡃁阿Ben，鬼迷心竅半推半就下就同阿Ben一夜情，仲中埋獎，所以楊明成頂綠帽笠到落腳指尾好陰功㗎！

Think Big天地純純兔「橙戰士」Regina姐姐，今次為部戲真係乜都試齊晒⋯⋯

重溫：何依婷為「找數」不惜著比堅尼洗車

何依婷 (Regina)今次第一次拍劇就飾演 KOL，仲係男主角楊明嘅女朋友。著上背心短褲嘅何依婷打扮已經超性感，仲喺劇中畀楊明狂摸大髀㖭！除不時著熱褲大騷長腿外，在13集一幕，何依婷更要換上性感比堅尼洗車，噴血指數爆燈！

著上背心短褲喺劇中畀楊明狂摸大髀一幕，睇到一班網民勁不滿，戥女神初次拍劇就被摸好唔抵，更鬧爆楊明動作過晒火。

扮「港女」入型入格公開擇偶條件唔要靚仔但要……

何依婷自稱單身冇拖拍，並公開擇偶條件：「唔使靚仔，但一定要有嘢吸引到我，例如佢捉棋好叻都係優點。為人孝順同有幽默感，我會比較欣賞。」被封為女神嘅何依婷，竟然唔喜歡收兵：「收兵即係要畀啲 signal 人哋，我從來唔會咁，有嘢寧願自己做好過攞着數。感情事我會謹慎處理，觀察對方好耐，如果發現佢對其他人冇風度，我都覺得要即時斬纜！」同劇中角色完全相反，一啲都唔「港女」囉！