楊怡羅仲謙遙距監控禁埋囡囡身 楊卓娜爆：「搞到我好大壓力﹗」
撰文、圖片：東方新地
楊怡羅仲謙夫妻檔內地掘金搵奶粉錢
楊怡（已改名楊茜堯）和羅仲謙（已改名羅子溢）有傳以八位數天價夫妻檔返內地拍劇，為搵奶粉錢，去年尾雙雙返內地掘金，接拍金牌監製梁家樹劇集《家族榮耀》，要同囡囡分開兩個月。闊別囡囡兩個月的楊怡，早前貼出囡囡學爬的影片遙遠為囡囡打氣，小珍珠現時交給同住的楊母照顧，楊怡與囡囡每日視訊以解思囡之苦。
姨媽楊卓娜爆羅家探B家規
羅仲謙楊怡雖然人在內地，不過兩公婆對囡囡生活所有事都會遙距監控，姨媽楊卓娜在小珍珠出世後被問有冇探姨甥女時爆唔係次次獲准探B，直指探B要有「批文」，而且每次入屋前要先沐浴更衣，楊卓娜話：「都明白嘅﹗因為我要出去開工，算係高危一族，不過我自己就係佛系嘅，生死有命，唔會太緊張﹗」楊卓娜更爆羅仲謙在家也要長戴口罩，而且放工都唔抱B，以策安全。
禁掂B女
楊怡羅仲謙近月在內地拍劇，希望能趕及農曆年前煞科返港，楊卓娜被問到細妹及妹夫不在港，可有幫忙湊B時就爆，日前前往探B，立即收到妹夫謙謙電話請佢立即戴番口罩，並且「唔好行咁埋我個女度」，楊卓娜話兩公婆都對她提出同樣警告，被禁掂姨甥女的楊卓娜話：「我冇得掂BB，好似影狗仔咁嘅遠距離影吓BB咋﹗」她又表示因疫情以來，楊怡謙謙更加不會帶囡囡外出，最多到樓下曬太陽，一直「都冇出過去見個世界」戥BB慘﹗
羅仲謙疫情下照拍《兒科醫生》
《兒科醫生》早前正式開拍，疫情高危下開工的鍾嘉欣下「限拍令」，劇組拍攝期延無可延，早前正式開機，在疫情高危下開工，劇中兩個爸爸鄭嘉穎及羅仲謙如臨大敵，為保護妻女，謙謙同老婆楊怡分房瞓又禁掂B女，而鄭嘉穎為咗細仔，更索性搬酒店暫住，忍痛同妻兒分隔幾個月，抗疫嚴陣以待！
嘉穎謙謙憂心忡忡自我隔離護家人
嘉欣突下「限拍令」，劇組為如期完成劇集，疫情稍緩已經開機，由於劇中有好多臨時小演員參與，加埋拍攝場地有不少演員演護士及醫生、工作人員及陪小朋友的家長，場地每日有數十人出入，難免令兩個家中有小朋友的爸爸演員鄭嘉穎及羅仲謙憂心忡忡！據知情者透露：「相對之前拍《陀槍師姐2020 》，嗰時疫情冇咁嚴峻，而且套劇唔似《兒科醫生》有咁多臨時小演員，謙謙每日要接觸咁多人，令佢好緊張，佢同嘉穎兩個本來好想劇組過咗疫情高峰先拍，不過，劇組因為要放嘉欣走，已經唔能夠再推遲，咁嘉穎、謙謙都做咗爸爸，其實都好體諒嘉欣同仔女分開咁遠嘅心情，所以最後都肯妥協，只有望疫情快啲過！」
相比住獨立屋的謙謙，家住北角大廈單位的鄭嘉穎，為保護妻兒，嘉穎更要搬住酒店，同妻兒分開住。早前他受訪亦坦然疫情開工要咬緊牙關：「細仔仲細，我又要開工，冇辦法，呢個係最難捱嘅時候，點都要捱過去！」
嘉穎搬開住酒店
不過，疫情高危下開工，兩個爸爸亦明白小心駛得萬年船，為保障家人健康，劇集開拍後兩人已經為抗疫自我隔離。據知情者透露：「始終BB抵抗力較弱，你話唔擔心就假，所以喺套劇開拍之後，嘉穎已經無返屋企住，依家搬咗去尖沙咀一間酒店，細仔出世冇耐，大仔又好黐佢，嘉穎都好擔心老婆一個睇住搞唔掂，但都冇辦法！謙謙面對嘅擔憂同嘉穎一樣，不過謙謙住比華利山獨立屋，同阿怡分房瞓，唔同樓層，為咗保護老婆同個囡囡，就算喺屋企謙謙都會戴口罩，更加唔敢抱BB！」為人父母當然緊張子女，相信嘉欣、嘉穎同謙謙，現時最大心願，同所有香港人一樣希望疫情快些過，一切回復正常！不用擔驚受怕！
