獨家直擊！林淑敏、許家傑甜蜜遊街《愛回家》人氣CP戲假情真

Aug 19 2020

近年收視屢創新高的《愛•回家之開心速遞》，劇中多對恩愛 CP成大家追看對象，當中「大小姐」林淑敏除了深受觀眾喜愛，她與許家傑演的「送水輝」更是人氣 CP，戲裡受歡迎，原來二人戲外一樣甜蜜。日前兩人在電視城收工，未有同劇其他家人同行，相約去又一城食飯行街，兩人一身黑白灰運動裝束，打扮襯到絕，在餐廳撐枱腳一小時，行街睇嘢亦好有默契互畀意見，相信劇集除了為二人帶來人氣與收入，更重要是令兩人生命中多個閨密，應該是合作三年最大收穫。

撰文、圖片：東方新地

林淑敏、許家傑甜蜜遊街

《愛•回家之開心速遞》不經不覺已播出超過1,000集，大小姐與送水輝亦由最初被大龍生（羅樂林）極力反對在一起，到現在感情修成正果，兩人戲份長做長有，工作以外亦會互相扶持。港男冠軍許家傑，出名愛操肌，其實他更視運動為健康之道，希望拍檔更健康，會拉埋林淑敏去做Gym，近期兩人便經常約埋同劇演員去行山。日前，本刊便拍到兩人在電視城收工，約埋去又一城行街食飯，戲外同樣超級甜蜜，當日由許家傑駕車載同林淑敏到達又一城，兩人泊低車後先去食飯醫肚，兩人揀了一間西餐廳撐枱腳近一小時，之後又孖到實去睇運動用品，入到舖頭先分頭睇嘢，睇睇吓又好快黐住畀意見，不過最後都冇收穫，之後兩人到餅舖買蛋糕，即使的骰一盒蛋糕，許家傑都好細心幫手攞，之後許家傑亦有默契先載女方返回大埔寓所，再駕車返回自己的粉嶺村屋寓所。

「大小姐」林淑敏同「送水輝」許家傑因拍《愛•回家之開心速遞》成為閨密，日前兩人在電視城拍完劇，結伴去又一城食飯行街，期間 Mandy（林淑敏）在餅店細心挑選西餅，許家傑即體貼幫她攞住小巧的蛋糕盒，極有默契。

當日兩人先到西餐廳用膳，遇上新冠肺炎疫情，兩人入座前先要量度體溫，更揀了餐廳較入的位置撐枱腳。

拍劇幾乎日日見都唔夠，大小姐同送水輝戲外一樣咁好感情，撐枱腳一小時再孖住甜蜜行街。

林淑敏、許家傑背景經歷相似惺惺相識

多得《愛•回家之開心速遞》撮合，「大小姐」林淑敏與許家傑演的「送水輝」，成為該劇最高人氣 CP，兩人更兩度獲無綫《萬千星輝頒獎典禮》「最受歡迎電視拍檔」提名，除了贏盡人氣，戲外亦感情深厚。

短短合作三年，兩人由最初合作連交戲都有困難拍攝時不停NG，到之後可以互相提點充滿默契，成為閨密，全因兩人背景和經歷相似，感情火速增長，00年參選港姐加入無綫的林淑敏，與09年選港男入行的許家傑，在無綫多年同樣由茄喱啡做到受歡迎配角，原來兩人還經歷過患病辛酸，林淑敏抗癌成功，原來高大猛男許家傑，童年亦曾有過語言障礙，當時的他說話口齒不清，曾接受過三年的言語治療，更要經過多年努力才捱過黑暗。據知情者透露：「Mandy（林淑敏）同 Jack（許家傑）最初合作嘅時候，感覺好陌生，初期要演啲親密戲都好尷尬，不過，拍處境劇幾乎日日見，唔使半年佢哋已經好熟絡，加上佢兩個都係選美入行，際遇又差唔多，話題好快已經好多！」

當日兩人一身黑白灰運動衫，外形和打扮都非常合襯，兩人孖住去睇運動用品，入到舖頭先各自去睇心頭好，不過間中都有互畀意見。

兩人孖實在商場遊走約兩小時，最後未有買到戰利品，之後兩人行去餅舖，林淑敏低頭細心揀西餅。

在又一城遊走兩小時，林淑敏和許家傑一齊去停車場攞車，許家傑先駕車送 Mandy返回大埔寓所，之後再獨自駕車返粉嶺，他將車泊在學校門口，之後再行入村。

Canteen傾劇本三個鐘

18年成功憑「大小姐」龍力蓮一角奪得《萬千星輝頒獎典禮》「最佳女配角」的林淑敏，對工作要求極高，更因而感染劇中拍檔許家傑。據Mandy身邊人透露：「 Mandy好緊張演出，拍劇前會捉埋Jack研究劇本，喺canteen可以一場戲傾三個鐘，最初Jack都唔太習慣，不過佢見Mandy對工作咁執著被感染，大家乜都攞出嚟傾，真係撞出好多火，慢慢佢哋幾乎每場戲都一定會一齊研究！」許家傑肯陪林淑敏不眠不休度劇本，女方亦被男方勤奮性格打動，Mandy曾經在訪問中大讚許家傑為操肌非常努力，她直言見到對方連趕兩套劇，明明收工身軀疲累還會為一場晒肌戲狂操肌，她說：「見佢為保持身形只吃一條雞肉，我覺得佢好慘，我相信努力嘅人一定有回報！」她更坦言，相對攞「最佳女配角」，她反而更希望兩人可以一齊攞「最受歡迎電視拍檔」，可見兩人已到有福同享階段。