林文龍開「亞視神劇」斟猛人開荒 郭可盈搵戚其義省招牌撼無綫

撰文、圖片：東方新地

林文龍暫別幕前演出密鑼緊鼓埋班改革亞視

一個人要兼顧多重身份一啲都唔容易， 現年53歲的林文龍，除了是資深演員，更是好老公及好爸爸，在熱播中的劇集《那些我愛過的人》深情演出連老婆郭可盈都力讚，他亦頻密為無綫宣傳，不過貴為亞視副總裁的他，另一方面，亦密鑼緊鼓埋班改革亞視！

從未做過管理層工作的林文龍，上任後要掌管公司營運以及策劃一切製作，是一項大挑戰，為打好CEO這份工，林文龍更推掉所有幕前演出，劇集《那些我愛過的人》其實是18年拍下的作品，更成為他離開幕前的「暫別作」。據知情者透露：「接受賴彩雲（亞洲電視控股非執行董事兼聯席主席）邀請上任亞視副總裁工作，文龍都考慮咗一段時間，佢未做過管理層，覺得係好大挑戰，不過接受咗呢項任務，佢亦好瞓身，之前傾緊唔少幕前演出都即刻推晒，唔想兩頭唔到岸，佢寧願專心做好管理層工作先，相信播完《那些我愛過的人》，暫時都好難再睇到佢喺幕前演出！」

畀好大話事權得神級監製出山助陣

去年一月一日正式接手改革亞視，林文龍已滿肚密圈，首先安排亞視總台進行大裝修，不過年初遇上新冠肺炎疫情，好多計劃都被迫延後，不過即使因疫情關閉，林文龍亦遙距斟人過檔，鬥心未有鬆懈。除了向資深演員好友招手，在圈中三十多年的他，更深明一個好劇本及好製作是成敗關鍵，埋班半年，近日便成功拉攏曾為無綫拍下多部神劇如《金枝慾孽》、《珠光寶氣》、《天與地》及《創世紀》等神級監製戚其義出山助陣亞視。

據林文龍好友透露：「今次搵到阿戚（戚其義）助陣，除咗文龍好落力去傾洽，可盈都大力拉線，可盈同阿戚好老友，當年百集神劇《創世紀》及《創世紀之天地有情》，可盈就係擔正第一女主角，套劇仲令可盈事業推上高峰。近年阿戚轉攻國內拍內地劇，嗰邊機會好多，不過文龍同可盈傾佢返嚟亦好有誠意，加上阿戚都想再拍廣東話劇集，而且文龍畀好大自由度佢，喺製作上有好大話事權！」

頭炮時裝愛情劇 斟大量猛人開荒

搵到神級監製戚其義省招牌，林文龍如虎添翼，已落實今年開拍兩部劇集，其中一部以「殺手」做題材，另一部是預計去年九月開拍的時裝愛情劇。據知情者透露：「因為嚟緊要開兩套劇，又要開綜藝節目，幕前同幕後工作人員需求量都好大， 阿戚同一班愛將好似蔡少芬、鄧萃雯、林保怡、邵美琪、黃德斌、周家怡都有接觸，而文龍亦落力傾以前一班師奶殺手好似羅嘉良、吳啟華、陶大宇回歸拍劇，不過頭炮係愛情劇，始終以年輕愛情故事做主線，著重靚仔靚女，所以阿戚搵近年喺影圈好吃香嘅Stephy（鄧麗欣）擔正， 而雯女（鄧萃雯）同Bowie（林保怡），都傾得七七八八！合作成數好高！」本刊致電戚其義所屬的凱藝娛樂，其經理人坦言因疫情關係劇集可能要延期開拍：「依家疫情只係緩和咗，但仍未完全受控，好多嘢都仲傾緊，有消息我哋會盡快公布！」

亞視總台關閉五個月大裝修，在去年七月正式復開，林文龍亦籌劃了連串大計，除了頭炮開拍時裝愛情劇，監製戚其義還會開拍另一部以「殺手」為題材劇集，除了鄭浩南，亦力斟一班上世紀師奶殺手如陶大宇、吳啟華及羅嘉良演出。

未有忽略家庭生活夫婦湊女大陣丈

雖然為打響頭炮博盡，上任半年忙個不停，不過林文龍亦未有忽略家庭生活，同老婆郭可盈結婚十七年恩愛有增無減，早前他便偷閒陪老婆去學校接寶貝女津津（林天若）放學，一家三口拖到實落樓梯，溫馨閃爆！當日林文龍夫婦湊女，更帶同助手及工人姐姐同行，相當有CEO氣場！