林嘉欣被老公糟質新戲要扮醜 失控用熱水壺入袋喪打黃秋生

撰文、圖片：東方新地

林嘉欣失控熱水壺入袋喪打秋生

再次同林嘉欣合作，袁劍偉大讚老婆演出精采：「 佢做咗好多功課、付出好多。」對於要求老婆扮醜演出，袁導演笑謂：「 佢鍾意畀我糟質。」身旁的嘉欣即甜笑謂：「 夠啦，飽啦，入正題啦！其實演員鍾意做到啲刺激到自己想像世界嘅嘢，我都有問佢點解要搵我演，佢話想打破我美好 太太、媽媽形象，覺得咁樣會令我成長。其實我都緊張，因為要做好多功課，我對手係秋生，我都怕被佢嫌棄。」嘉欣自爆有場狂打秋生嘅戲假戲真做：「 拍嗰陣係冬天，我唔記得咗自己放咗個熱水壺入袋，我就拎住個袋係咁打落秋生個額頭，導演未cut 我就一直打。拍完先醒起個水壺，我同秋生講咗一萬句對唔住，見佢匿埋一邊猛捽額頭，真係好慘！」

湯怡被家樂鬚根拮到痛

至於演員之一的陳家樂稱導演對佢特別關照，秋生和嘉欣每個鏡頭拍一兩個 take，但佢就要拍多幾個，最多試過十幾個 take，因為導演想佢突破以前固有框框，所以在《 死因無可疑 》中會看到以往家樂在熒幕前從沒出現過的表情和眼神。此外，陳家樂與湯怡今次在戲中飾演情侶，並會有激烈床戲，湯怡坦言兩人份屬老友默契十足，但就踢爆家樂唔鍾意拍攝後做賽後檢討，家樂笑謂：「 平時唔熟嗰啲，拍完就拜拜，今次佢係咁問我覺得點，仲話我啲鬚拮到佢好痛，我聽完個心都乸住，好似自己表現好差咁。」兩個老友你一言我一語互窒對方，場面搞笑！