林作半山複式豪宅私藏裕美曾裸體求婚 富媽媽指未夠班入門
廣告
才子林作近年與失婚裕美在公在私有唔少交集，再三傳出緋聞終於被影到十指緊扣被爆拍拖一年，其後二人亦高調認愛！本來男未婚女未嫁，擦出愛火又何須大驚小怪？可惜林作揀女友眼光落差太大，舊愛係十優港姐冠軍兼劍橋法律系畢業生麥明詩，新歡就係出名會考零分兼曾「 出軌 」嘅失婚婦裕美，前度跟現任條件對比差天共地！呢對失婚婦與富家子兼牛津畢業之配係唔係門當戶對，即時成為全港熱話。
撰文、圖片：東方新地
裕美被嘲林作頻頻出post反擊
外人說三道四其實又使乜咁認真，不過一向行徑冇定向估佢唔到嘅林作，一而再出千字文為新歡護航，戀情曝光短短幾日之內狂 po 超過十五條 IG 逐一反擊新聞報道、網紅評論甚至網友私信。護花心切、神經緊張到一個點，好似網絡作家葉朗程咁啱有文提到有錢有家世有學歷醫生兒子被妖氣所吸，名門之子竟然與膠門都不如嘅學渣行埋時，林作聯同裕美都對號入座出文反擊。係真愛至上完全唔介意旁人指點，定係太介意呢？就真係見仁見智啦！
林母指裕美未夠班 婆媳勢成水火
兩口子一段感情曝光不足十日，日日都有新進展，與林作前度比較完，又被外間比較家世，一一反擊網友撩交嗌後，真正難關其實都係林作嗰位富媽媽王莉妮 (Lily)！一直有報道指 Lily 唔接受兒子新歡一事，最新發展係兩母子接受傳媒訪問，林媽媽講到明拒絕裕美入門做新抱，仲話就算奉子成婚都行唔通，一陀 B 就立刻同林作斷絕母子關係，完全冇商量餘地咁話！裕美又自爆已收下男友鑽戒、承認獲對方多次求婚，甚至裸體求婚，裕美就話林媽媽咁諗係好正常，希望Auntie 畀啲時間去認識佢，唔好單憑新聞報道就判佢死刑喎！未過門婆媳關係已經勢成水火， 睇嚟平時伶牙俐齒轉數奇快嘅林作，今次真係有排煩囉！
