李璨琛女女天價拍奶粉廣告身價超越老竇得意女Lucy成廣告小天后

Jun 10 2020

李璨琛唔係靚仔，太太梁志瑩（Pae）都唔係大美人，不過二人所生的兩歲女兒Lucy（李元元）卻極度惹人喜愛，大頭大肚dum不倒翁身形，再加上爆笑鬼馬表情，Lucy被稱為「港版蠟筆小新」，吸納大批鐵粉日日捕住IG追睇Lucy近況，唔止人氣高過爸爸李璨琛，身價亦在同期星二代中稱霸成為廣告小天后。

撰文、圖片：東方新地

阿女識賺錢李璨琛印印腳享福

最近Lucy為一個奶粉品牌拍電視廣告，賣萌對她來說絕對是easy job，而天價酬金就令其母食過翻尋味，據知打後再有廣告商睇中Lucy都獅子開大口，對於經常偷拍女兒放上社交網，不斷為女提升知名度有利接廣告，Pae被轟當個女搖錢樹。人怕出名豬怕肥，「BB界KOL」Lucy就愈肥愈受歡迎，有得意女幫手賺錢養家，星爸李璨琛可以印印腳享福，真開心！

李璨琛和太太梁志瑩（Pae）都不是顏值高的父母，但他們的囡囡 Lucy（李元元）卻負負得正，擁有一張令人難以抗拒的面孔。

囡囡 Lucy成為 BB界網紅吸金力超強，入行多年的李璨琛人氣都比下去，冇工開的日子，他經常攤在家中沙發，似乎真係無事忙。

疫情令不少藝人工作大受影響，近年主力拍電影的李璨琛去年底拍完《大盜演》一直清閒至今，除了勤於健身行山練大隻之外，亦在其女兒 Lucy的個人 IG內不定時現身，不過幾乎次次都係攤在沙發上瞓到隻豬咁，相比之下，囡囡 Lucy做咗繁忙 BB，忙住被媽咪拍片同影相放上社交網，兩歲人仔日日出 post慰藉一班「 Lu粉」。

Lucy自小被母營造可愛形象，漸漸長大的她走的是搞笑路線，其個人 IG曾出現過不少植入式廣告，包括濕紙巾同護膚品。

人仔細細六位數接拍奶粉廣告

李璨琛太太梁志瑩（Pae）身為時裝界潮人，早已洞察先機為囡囡 Lucy鋪路做 KOL，結果非常成功，兩歲的 Lucy的個人 IG早已擁有15萬粉絲，除了成為媽咪間時裝網店的御用模特兒，可愛度爆燈的 Lucy更成為廣告小天后，知情者透露：「 Lucy一出世就活喺閃光燈下，媽咪 Pae日日幫佢影相拍片放上網，無非都係想大家睇到囡囡有幾得意，後來仲成為賺錢契機，愈來愈多人搵 Lucy拍廣告，早前拍嗰個奶粉廣告酬勞超過六位數字，童星嚟講真係天價，仲高過佢阿爸 Sam（李璨琛），本來有其他星二代人選，不過 Lucy真係最適合，casting時表現超晒班，廣告客戶覺得貴都值，不過聽聞拍完呢個廣告有其他客搵 Lucy，佢媽咪就繼續開高價，心都雄埋，Sam就冇意見，畀老婆話晒事。」小可愛 Lucy表情多多非常過癮，有價有市都好合理，不過有星媽在背後操控，成件事開始變質。

早前 Lucy拍了一個奶粉廣告，冬菇頭髮型、肥嘟嘟的她好易認，在廣告中更表情多多，非常活潑，雖然廣告身價超高，依然成為廣告界新寵。

Lucy拍奶粉廣告，Pae每個鏡頭都在旁指導囡囡，還堅持睇 playback，絕對是個緊張星媽。

網民炮轟視女兒為「搖錢樹」

早前 Pae上載一段 Lucy不願拍照的片段，更留言指女兒發脾氣︰「有人唔鍾意畀人影，發脾四發脾四發脾四。」片中見到Lucy多次耍手擰頭向媽咪「抗議」不想被拍，表情相當委屈，但Pae仍繼續錄影，又對 Lucy說：「我影梗姐姐煮嘢之嘛，都唔係影你。」事後引來大批網民不滿，質疑 Pae視女兒為「搖錢樹」，炮轟她為咗吸納廣告同 sponsors乜都做得出，為此 Pae冷冷回應：「時間會證明一切！」Lucy正值最得意時期，Pae一於閒言少理，抓緊黃金機會賺到盡，到囡囡長大後有自己思想唔會再任人擺佈，到時真係睬你都傻！

Lucy自小被母親訓練有素，周身肉的她著邊類型衫都 carry到，仲識擺出 chok樣，天生是做模特兒的材料。

星二代吸金勁敵

與Lucy同齡的星二代為數不少，據知不少廣告客都愛找他們拍廣告及出席宣傳活動，不過唔係所有星級父母都見錢開眼。同樣是人氣 BB的林芊妤（ Coffee）囝囝「伯伯」翟德彥，早前母子檔出席公開活動大受歡迎，Coffee表示最初為囝囝開 IG帳戶已表明謝絕一切廣告，只想紀錄一下伯伯的童年，想不到一年已累積約14萬位 followers，不過為了囝囝的私隱同自主權，Coffee指兩歲開始伯伯會「光榮引退」，不想他有太多關注。