疫情告急外闖夢碎！李施嬅、胡定欣疫市加價回巢

撰文、圖片：東方新地

李施嬅加拿大劇打正旗號做女一

一套《金宵大廈》令李施嬅由不被看重到演技被認同，事業逆轉，去年四月離巢的她，簽約美國經理人公司Authentic ，成為「Marvel隊長」Brie Larson同門，計劃闖荷李活，不久已透露接到一部美國電影，及加拿大劇 集《 Blood and Water 》第三季， 由於在上一季的《 Blood and Water 》，李施嬅成功入圍有「加拿大奧斯卡」之稱的《 2019加拿大銀幕獎》「最佳女配角」提名，令她在新一季打正旗號做女主角。

李施嬅唔想40歲原地踏步

外闖計劃多多，就連被邀回歸拍《金宵大廈2 》，無綫亦要遷就檔期，為求成績更勝之前，李施嬅更霸氣開三大條件，要求增加資源、睇劇本及原班人馬演出，認真威到盡。據知情者透露：「喺TVB咁多年，Selena（李施嬅）唔似好姊妹杏兒、定欣咁好際遇，十五年嚟都冇攞過台慶頒獎禮獎，上年《金宵大廈》爆出，攞到『最受歡迎電視女角色』，佢真係吐氣揚眉，當時杜之克同樂小姐（無綫兩大高層）已不停斟Selena 返無綫。不過，上年簽咗美國經理人公司，Selena 已經接咗部美國電影，同埋喺加拿大《 Blood and Water 》第三季坐正女一，既然外面世界咁大， 佢都想喺外面闖吓先！快將40歲唔想原地踏步，怕年紀大咗會冇膽去試，就算之前無綫搵佢拍《金宵大廈2 》，Selena 都要度一輪期！」

李施嬅海外開工遙遙無期

今年三月李施嬅已啟程加拿大開工拍劇集《 Blood and Water 》第三季，不過只拍到三分二，新冠肺炎疫情突然加劇，劇組緊急叫停，李施嬅亦被迫返香港等消息。據知情者透露：「之前五月疫情稍緩，Selena 仲諗住好快可以再開工，已經諗好等劇組一通知就即刻飛去加拿大為套劇埋尾，拍完先返香港拍《金宵大廈2 》。」但計劃追不上變化，近日新冠肺炎疫情告急，美國和歐洲成重災區，海外開工遙遙無期，李施嬅外闖計劃一波三折，亦只好改變策略。據好友透露：「美國同加拿大疫情仲未受控，劇組都覆唔實幾時可以埋位，Selena 都唔想無了期咁等，怕再拖落去，自己好快被遺忘！加上樂小姐一路傾佢都好有誠意，畀好大自由度，而且簽邵氏彈性大，樂小姐講明，如果將來佢要去外地拍嘢，都可以遷就時間，加上可以拍到內地合拍劇，攻內地市場唔成問題，喺依家呢個時勢，真係最穩陣！」

胡定欣兩年前已傾古天樂

都係嗰句「人算不如天算」，相比去年才上位的李施嬅，早已是無綫兩屆視后的胡定欣，自然更大野心向外闖，兩年前拍完劇集《包青天再起風雲》，已經有其他公司向定欣招手，當中和古天樂經理人公司更一拍即合，本已計劃約滿即過檔。據知情者透露：「兩年前娛樂圈仲好蓬勃，電影市道暢旺，定欣同古仔傾約，希望可以拓展電影市場，又可以返內地拍劇拍電影做商演，發展大計一大籮，嗰時佢都諗住休息充電，等之後全面投入工作，所以同無綫未約滿都冇再接劇，又有邊個估到年頭會出現新冠肺炎，好多內地工作都停晒，電影冚晒旗，加上無綫一路都好落力留佢，價錢仲比之前高，既然形勢大變，定欣都唔想喺呢段時間冒險出去闖，最後放棄簽古仔，留番喺無綫。」路不轉人轉，拐過彎何嘗不是辦法？明天一定會更好！