教17歲A0女咪嘥Quota 朱千雪：唔好受社會壓力影響！

朱千雪 解釋A0係咩

喺其中一集《心理急救室》嘅片段中，朱千雪同岑杏賢收到一位觀眾發畀佢哋嘅問題，原來對方係一個17歲準備升中六嘅女仔，話有好多同學開始拍拖，但自己仍然係「A0」，講到呢度岑杏賢唔係好知咩係「A0」，反而千雪BB就好快解釋「A0」即係「Available（單身）但拍拖次數係0」。

之後千雪BB話自己唔係好理解亦唔係好認同呢種年輕人嘅心態：「你到第日結婚都係只可以揀一個啫，之前拍過十次拖、廿次拖唔係叻啲囉，你話10A就叻啫，A10唔係叻囉！」

自認老一輩

千雪BB續說：「以前嘅年代啲人係好鍾意啲冇拍過拖嘅女仔，當然可能我哋係老一輩啦！但17歲未拍過拖驚咩呢？有個28歲都係A0嘅都唔驚啦！我成日覺得女仔拍拖嘅quota（配額）唔多，我唔會因為要Experience（拍拖經驗）而去嘥呢樣嘢囉。」

而岑杏賢就解釋：「其實佢講個重點出嚟，佢嘅需要係想有人關心佢同錫佢，如果有兄弟姊妹或者爸爸媽媽，其實都係被愛緊嘅。」

最後千雪BB告誡年輕人：「唔好受社會壓力影響，而覺得呢樣嘢（拍拖）變咗係一個需求。」

想睇千雪BB點樣急救17歲A0女？去片！

朱千雪生日狂食蛋糕 連日慶祝赲樣盡現！

朱千雪曾於個人社交網大哂連日的慶生相，見到當中有唔少好姊妹同壽星女慶祝生日，包括岑杏賢、湯洛雯及蔣家旻等，更有好姊妹送花畀千雪BB，大家仲不斷食蛋糕以慶祝她29+1的生日。

從其上載的相作估計，千雪BB至少食咗6個蛋糕，又有花形，又有心形蛋糕，真係食唔停！

千雪留言：「I may not have a lot of friends, but the ones I do have are amazing enough to celebrate with me when I least expect it, and some with me even more than once. ❤️🎂 I am a very lucky girl. 😊（可能我並冇太多朋友，但我身邊嘅朋友已經夠晒奇妙，喺我冇預期嘅情況下為我慶生，有啲人仲為我慶祝咗好幾次❤）」

千雪BB唔知係咪讀書辛苦，見到近鏡影個人大頭相時有黑眼圈同眼袋，但整體皮膚都仲keep到。

從千雪BB上載的慶生相中可見，無論圈內圈外，她都人緣極佳！

朱千雪收花冧爆哂姊妹情深

29+1的千雪BB有咁多人同佢慶祝生日已高興不已，仲要收到一大束玫瑰花，即刻甜爆，挨落湯洛雯個膊頭上，而靚湯則指自己與千雪BB切咗三個蛋糕咁多，認真姊妹情深！

朱千雪《EU超時任務》入屋

千雪選港姐後加入無綫，參演過不少劇集，但說到其代表作一定係2016年《EU超時任務》！千雪飾演的Madam Ling凌晨風令人留下深刻印象，與渠頭(王浩信飾) 的一段情更是讓觀眾心酸落淚！

喺當年台慶頒獎禮中，朱千雪同王浩信都憑《EU》成為視后、視帝大熱，不過最終只獲「最受歡迎劇集搭檔獎」，唔少觀眾都好失望！

朱千雪美貌與智慧並重

千雪BB人紅唔囂又夠貼地，發展演藝事業之餘亦是好學不倦！千雪早年畢業於西門菲莎大學商業和傳理系，後來於香港中文大學攻讀企業傳播社會科學系碩士都仲未夠，佢選擇停工一年，再修讀香港城市大學法律博士學位！

朱千雪為人貼地，素顏返學待人絕無架子，據知仲引來唔少狂峰浪蝶，成為Law界女神 ！不過佢為讀書犧牲不少私人時間，有時一日要花10至12小時溫習。

「美貌與智慧並重」、「高學歷女神」等，朱千雪當之無愧！