曾志偉子曾國猷離婚前妻張可蕙曾姣勾苗僑偉爆粗鬧夫家被逐出門

Feb 18 2021

曾志偉子曾國猷今日被驚爆已離婚！其新抱Renee（張可蕙）日前在社交網公開新戀情，才驚爆她和曾志偉孻仔曾國猷已離婚，其實早在2013年她就曾被志偉逐出家門。2012年12月曾志偉為維持娛樂圈和諧而涉嫌掌摑黃浩，最終被落案起訴，翌年6月須第4度返警署報到，其新抱Renee卻被揭在網上爆粗狂數夫家，有傳嬲到震的志偉為免在應付官司期間添煩添亂，已將國猷和新抱逐離家。家嘈屋閉鬧劇搬到facebook上演，揭破志偉一家幸福外衣下家宅不寧，亦盡顯Renee的XO港女本色，既要嫁得好住大屋使工人要錢要歎又要老公型英帥。婚前喜愛夜蒲獵金龜的她，自與夫家不睦後即回復本性，在志偉大壽派對上公然姣勾老爺兄弟苗僑偉（三哥）索吻合照。看來大罵老公死肥柴嫌對方樣衰戇居的她，出口並非一時意氣！

文、圖：東方新地

曾志偉子曾國猷前妻張可蕙專獵富二代

現年40歲的Renee出身大圍屋邨，婚前任職化妝品sales，喜愛夜蒲獵有錢仔，但次次迫婚不成便遭拋棄。2011年曾國猷在夜場邂逅Renee中伏，相識兩個月搞出人命，在2012年5月誕下女兒曾詩雨（Ashlyn），同年9月奉女成婚，婚後三口子不時晒幸福，豈料溫馨表面得個殼，Renee港女本色現形，網上狂數夫家，用詞相當冇品，除粗口橫飛，又攻擊老公外形，稱他「死肥柴」戇居、樣衰，奶奶則「更年期無理取鬧」。

曾國猷前妻張可蕙爆粗鬧夫家 — 2012年曾國猷迎娶爲他誕下女兒的Renee，在Holiday Inn擺酒兼設百日宴，曾志偉不但包場送酒席，更豪送百萬金器鑽飾畀新抱，一家喜氣洋洋。相中左至右分別為老大曾寶儀、老三曾國祥、孻仔曾國猷、新抱Renee、志偉已故的第二任妻子宋麗華及志偉。

唔騷夫家狂黐型男

事實上結婚半年Renee與夫家關係已勢成水火，2013年4月初曾志偉60大壽錄影，曾家齊心現身會展，表面無異樣，節目完畢後轉場到西環「尚品薈」繼續狂歡，由於屬私人派對，場內無記者，Renee回復「真我」，甚少騷曾氏一家，與奶奶更加面左左，反之對待志偉眾老死如譚詠麟、苗僑偉、方中信、謝天華等積極埋手，回復未嫁時蒲女本色，當中只有女人湯圓苗僑偉肯應酬她。有目擊者指，被三哥迷到暈陀陀的她，懶理三嫂在場，幾杯到肚不停撩對方猜枚劈酒合照。

有目擊者表示：「Renee成晚死纏三哥，係咁讚三哥靚仔有型，又話要錫三哥影合照，電到三哥陀陀擰，咁啱三嫂（戚美珍）行開咗同朋友傾偈，三哥又飲到high high哋就主動錫Renee，當錫啖個細姪女啫！」目擊者指由於現場人多兼烏燈黑火，睇到此幕的人並不多，奶奶宋麗華是其中一個。散場後宋麗華雖與國猷夫婦同乘一車歸家，但奶奶全程對新抱黑面相向。成功獲三哥賜吻的Renee事後不時向密友展示勝利合照。

𢱑志偉千萬開舖

比兒子精明得多的曾志偉，當初已對Renee印象麻麻，但有餡大晒別無他法。知情者指︰「拍拖冇耐Renee已經搬咗入志偉銀線灣屋企，當時佢大緊肚，曾家好遷就佢，Renee為免婚事有差池，亦都聽聽話話，當時尚能夠融洽相處。」

直至2012年9月結婚，加上有女在手後，Renee已原形畢露。一心以為嫁入曾家印印腳做少奶奶的她，發現事實並非想像中一回事，開始諸多不滿，埋怨湊女辛苦、奶奶難頂，經常向國猷開火，曾國猷不勝其煩，常以工作為由早出晚歸，假日都冇影。Renee再惡亦未敢向老爺奶奶發難，一口怨氣便在facebook及親子王國上宣洩。

Renee在facebook講到明嫁給曾國猷全因佢老竇係曾志偉、貪曾家有大屋有工人，又自爆早已花光志偉所給的一百萬，堪稱港女中的XO！據知Renee與國猷拍拖不久已辭去sales一職，做全職曾家婦，誕女後又心思思想搞化妝品生意，不斷慫恿國猷叫志偉打本千萬給她，引入護膚品牌開舖，最後僅𦧲到一百萬在網上代理減肥機及減肥膏，但由於經營不善冇錢賺，再慫恿國猷索錢不果，便日鬧夜鬧老公搵唔到錢。