那些年欠10幾萬卡數！曹永廉 感激邵美琪幫手還債
曹永廉《兄弟大茶飯》晒廚藝
TVB飲食節目《兄弟大茶飯》搵嚟曹永廉與蕭正楠做主持，雖然二人拍劇比較多，但做主持一樣難唔到佢哋，今次呢兩個男人為照顧一眾長期拍攝外景的藝人及劇組台前幕後的工作人員，一於走入廚房為大家親自下廚，用食物慰勞大家！
而第3集，除咗阿蕭飛去橫店煮大鑊飯畀拍緊新劇《包青天 – 再起風雲》嘅演員食，有份演《包青天 – 再起風雲》嘅阿曹也偷偷地抽時間下廚，煮小菜慰勞大家！
蕭正楠 串曹永廉拍劇為錢冇理想
食到一半，蕭正楠講起上嚟橫店煮大餐都唔容易，曹永廉就當然要寸吓佢話蕭正楠都有收演出費㗎嘛！但蕭正楠就串番曹永廉話佢拍劇為錢冇理想啊！年輕人，係咩驅使你啊？
不為理想只為生活
阿廉直認係鹹魚，係窮，仲話要生活唔可以只談夢想！佢講呢番說話，其實因為未紅前曾經做歌手，而且霉過好幾年，更加欠下十多萬卡數！
曹永廉 歌手星途暗淡
事關阿廉喺1994年以歌手身份出道，仲喺同年勇奪大台十大勁歌金曲頒獎典禮嘅新人獎銅獎！阿廉喺出道嘅短短兩年間已經推出咗三張個人大碟，包括《情深款款》、《唯一的女神》同埋《不惜一切》！可惜，阿廉當年星途暗淡，最後佢決定暫停歌手生涯，由經理人搭路入TVB簽約做藝員，不過佢話經理人話搭路成功，但講畀佢知個底薪時，阿廉聽到係喊咗出嚟，因為係低到喊，但最後都係簽約，因為阿曹自知人氣低，要拍劇才能入屋！
感激邵美琪幫手還卡數
阿廉話以前覺得娛圈跟紅頂白，人靠衣裝，佢不時喺名店、尖沙嘴百利買衫置裝，次次碌信用卡找數，結果條數愈滾愈大，卒之欠下十多萬卡數，但因為人工低一直只能還min pay！直至加盟TVB一年後，阿廉被安排拍《妙手仁心III》，劇中佢同邵美琪情侶演出頗受歡迎，不少商演搵二人一齊出騷，邵美琪雖然入行以來一向都唔做情侶檔出騷，但她知道阿廉欠下大筆卡數，為了令他可以還清債項，才答應與他情侶檔登台，阿廉說：「好多謝佢！佢一向都唔做，但佢亦都知佢唔做我就冇得做，冇得做就還唔到錢，所以佢都幫我手還咗大部分債項。」
後來阿廉人氣上升，工作量漸多，他劇接劇之餘，仲有得出騷同登台，好快還清所有卡數，佢也決定cut剩一張信用卡！
其實近年大台都俾咗唔少機會阿廉重返舞台，就好似《流行經典五十年》都搵咗佢做嘉賓一展歌喉！等我哋一齊重溫下！
曹永廉 －〈糊塗情感〉
曹永廉 湯寶如 – 〈其實你心裏有沒有我〉
阿廉上年就喺台慶拎咗佢入行以來第一個最佳男配角獎，唔知幾時拎返個歌曲獎？
蕭正楠 也是歌手出身
近排蕭正楠(Edwin)孖住好兄弟曹永廉主持飲食節目《兄弟大茶飯》，除咗做戲連主持都撈埋，真係辮辮掂，其實佢唱歌都一樣得㗎！唔講唔知，原來蕭正楠係參加歌唱比賽出道嘅。初初出道嘅佢仲畀人話係「翻版鄭伊健」！
Edwin Siu（@edwinsiu）分享的貼文 於 張貼
今晚有冇睇橫店歪文先？ #條後呔比老廉坐扁哂 #兄弟大茶飯 #橫店歪文 #廉哥去shopping
Edwin Siu（@edwinsiu）分享的貼文 於 張貼
Edwin喺2001年曾經參加《太陽計劃之優質樂壇接班人》獲得「冠軍」同埋「超人氣潛質奬」。另外，喺《全國百事新星大賽》亦得到「魅力新星大獎」。
拎咗咁多個大獎，當然得到各大唱片公司嘅注意！當時佢就受到「大國文化」唱片公司賞識，喺2002年正式簽約成為旗下藝人出道。
不負眾望，蕭正楠當年橫掃咗七個大型頒獎典禮嘅男新人獎。而佢嘅歌唱生涯至今亦推出過四張個人唱片。
為人熟悉嘅歌曲包括〈接受我〉、〈十個分手的理由〉，仲有同關心妍合唱嘅〈特別鳴謝〉。依家就等我哋一齊重溫吓！
蕭正楠 -〈接受我〉
蕭正楠 -〈十個分手的理由〉
蕭正楠 關心妍 -〈特別鳴謝〉