51歲張可頤揮低方皓玟 拍住鄭中基拍ViuTv《暖男爸爸》

撰文、圖片：東方新地

鄭中基劇癮起拍男版《暖男爸爸》 方皓玟被飛唱作CP合拍無望

影后楊千嬅上年回巢無綫拍《多功能老婆》，無巧不成話，同樣在影壇大放異彩的鄭中基，近日亦答應ViuTV拍攝《暖男爸爸》，以父子情為題材的溫情劇，狙擊舊愛千嬅做湊仔公。能成功拉攏鄭中基加盟，ViuTV亦隆重其事，除了為他度身訂造慈父角色，劇中女主角當然亦精挑細選，千呼萬喚始出來，近日終於落實由離巢無綫八年的張可頤過檔擔正，為劇集卡士加碼，不過有人快活有人愁，ViuTV成功簽到張可頤做女一，但同時令本來同在考慮之列的方皓玟被飛出局。

兩手準備無奈飛起方皓玟

據知情者透露：「一個劇嘅成功，除咗劇本之外，男女主角都好重要， Ronald（鄭中基）答應接拍之後，Viu高層就努力斟張可頤做女主角，但因為套劇始終係男人劇，女主戲份冇咁重，監製都擔心張可頤未必會接，所以都兩手準備，監製同時傾唱作女歌手方皓玟拍Ronald，因為佢兩個合作做過演唱會，樂迷對佢哋呢pair唱作CP好受落，本來Charmaine（方皓玟）已經答應演出，但因為最後張可頤落實接，對套劇嚟講，多個演技派女主助陣，當然係一個好消息，監製都無奈飛起Charmaine！」

張可頤事隔8年再拍劇TVB劇 與宿敵宣萱打對台

對上一次拍無綫劇，已經是12年的《天梯》，當時男拍檔陳豪近日正與宣萱忙於拍攝無綫新劇《陀槍師姐2020 》，難道真是一山不能藏二虎，與宿敵宣萱命中注定要打對台。據知情人士說：「自從試過患甲狀腺功能亢奮，要喺事業高峰期停工兩年休養，可頤體會到冇嘢比健康重要，依家就算接劇，佢都唔會畀自己太過勞累，所以近年佢都係客串拍吓內地劇，貪時間安排上冇咁緊迫，今次拍Viu劇，佢除咗睇咗劇本好鍾意個角色，另一方面亦好想同Ronald合作，所以就算戲份冇男主角咁重，佢都唔介意，覺得最緊要角色有得發揮！」

魚與熊掌不能兼得，唔知觀眾又想睇邊個多啲呢？

張可頤大病後享受生活公認好戲之人

試過在事業高峰期患上甲狀腺功能亢奮，要停工兩年養病的張可頤，康復後更珍惜健康，近年減產享受生活，在新冠肺炎疫情下，亦開始為復出做足準備，除了勤做運動及行山保持體態健美，亦愛偷閒鑽研廚藝。

千禧年無綫五大花旦之一的張可頤，當年拍下不少經典作品，與死敵宣萱97年因拍《難兄難弟》傳不和，不過兩人飾演的邵芳芳及程寶珠角色，至今仍令人拍案叫絕。張可頤03年更憑《九五至尊》呂四娘一角封無綫視后，又有份參與神劇《金枝慾孽》演安茜一角。