林芊妤餵足19個月、官恩娜更衣室餵奶被侮辱！為BB幾辛苦都埋身！撐餵母乳星級媽媽

撰文、圖片：東方新地

岑麗香拍劇在即仍然繼續餵

婚後迅速報喜，岑麗香去年四月順利誕下與另一半的愛情結晶囝囝Jacob。雖然產後四個月已經收埋身復埋工，不過香香就話即使拍劇在即，依然會繼續餵哺人奶：「雖然佢母乳、奶粉都食得好好，但係既然母乳有益，只要佢肯食，我就會繼續努力畀佢！」

陳凱琳為BB健康兩胎都堅持埋身

18年與當家小生鄭嘉穎結婚，婚後兩年抱兩誕下大仔Rafael和現在剛滿百日的Yannick，陳凱琳兩胎都堅持埋身餵人奶，上圍亦都因此全面升cup：「我唔想個焦點落喺身材度，我好鍾意餵母乳，同BB好有親切感，最緊要就係BB健康吸收到足夠營養。」

林芊妤餵足19個月

18年10月誕下囝囝，Coffee 林芊妤原訂計劃係餵人奶餵到半歲，點知囝囝翟德彥太依賴母乳，搞到餵到十九個月大，依然要每日至少埋身九次，當媽咪係水同奶嘴，反而唔夠營養又吸收水份不足，為仔戒人奶 coffee 狠心將囝囝送到公公婆婆屋企暫住，絕對係可憐天下父母心。

宋熙年仔仔食量驚人

16年同 TVB 筍盤陳智燊結婚，婚後享受完兩年二人世界，宋熙年即積極造人，亦都如願三年抱兩，繼現時兩歲大的 Damon 後，月初再誕下次子 Jamie。未夠二十日大嘅人仔 Jamie 食量驚人，每三個鐘埋身餵一次、每次食量超過100毫升，連宋熙年都話比起第一胎時更具挑戰更需要精力。

吳雨霏準備結束母乳旅程

去年九月誕下細女 Galile，吳雨霏今年四月出 po 表示埋身餵足七個月人奶，終於準備結束母乳旅程：「 雖然已經準備好恢復自由，但係都為咗要結束同囡囡嘅緊密聯繫而感到難過。我好感恩自己身體能夠一直養大囡囡，媽媽真係好不可思議！」

官恩娜更衣室餵奶曾被侮辱

官恩娜婚後誕下兩胎，大仔 Gabriel 和二女 Aurelie 都堅持人奶餵哺，試過在大仔五個月時在五星級酒店更衣室餵人奶，被中年婦人侮辱及騷擾。又試過在瑞士海拔2,000米的Moléson mountain高峰上餵8個月大囡囡貼相上網，慘被網民鬧爆，說明再自然不過的天職母性，依然不見得人人接受和諒解。

梁靖琪發文撐人奶好處多

Toby 梁靖琪去年12月誕下兒子Roman施睿文後，一直享受亦深感自豪身為一個人奶媽媽。多次po相展現哺乳日常外，亦發文表示人奶好處多多、係上帝嘅禮物，不但對孩子健康有好處，亦能夠加深母子之間嘅關係，因此母乳又被稱為「 液態黃金 」。

張嘉兒出書教新手媽媽餵人奶技巧

2015年結婚後，張嘉兒先後誕下兩個囡囡，唔止兩胎都堅持埋身餵母乳，大學時修讀營養學及公共衞生嘅佢，亦乾脆學習加實踐搖身一變成為母乳專家，去年仲出版埋個人著作《母乳餵哺教室 》，教新手媽媽各種餵人奶嘅好處以及方法技巧。