獨家！25歲戴祖儀誤撻32歲「速食王」羅天宇 兩度斷正送返工仍死口唔認愛
撰文、圖片：東方新地
羅天宇、戴祖儀雙J玩狗勁sweet
羅天宇係識食小生，入行十三年女接女，與前度女友湯洛雯拍拖四年，拍拖初期即使被斷正都死口唔認，今次睇中25歲的無綫新紮小花戴祖儀，手起刀落極速撻著，被羅天宇生擒的戴祖儀自知上緊位， 而男方亦想繼續扮單身，二人有共識玩地下情。前年聖誕節，羅天宇曾於訪問中透露自己第二年單身過 聖誕，未幾即被影到與戴祖儀在淺水灣密會撐枱腳。當晚在雙J淺水灣一間半露天餐廳食飯，其間隔籬枱食客帶住兩隻狗仔，同樣愛狗的雙J一齊蹲低玩狗，之後仲落沙灘散步，中途更被指疑似拖手幾秒。
Tesla戰車送返工 兩度斷正仍否認
男未婚女未嫁，拍拖本來好正常，不過羅天宇與戴祖儀選擇偷偷摸摸，繼續擘大眼講大話，以為呃到全世界。羅天宇駕駛其母送贈落地唔夠半年的Tesla新戰車返將軍澳電視城，駛過了正門突然停下來，讓戴祖儀行回頭路返公司，當日身穿紅衣超短 裙化淡妝的戴祖儀，中午返工開廠至晚上十時，放工則自行call車 返回位於啟德的寓所。
另一日，羅天宇又車載戴祖儀返工，今次仲謹慎，當車到達電視城街頭，戴祖儀便跳車，獨自扮若無其事步行約300米返回電視城。雙J被本刊記者兩度撞破鬼祟同車返工，為免自打嘴巴，女方兩次都刻意提早落車，絕對是此地無銀，二人寧畀人知莫畀人見，有晒默契。棄做律師誓要入行做星的戴祖儀，備受公司力捧大好前途，行湯洛雯條舊路與羅天宇撻著初期玩暗交，係真愛定錯愛？拭目以待。
緋聞情侶夾晒口供唔認愛
緋聞男女當然一早夾晒口供，羅天宇日前出席無綫劇集《香港愛情故事》開鏡儀式，與龔嘉欣演夫婦有親熱場面的他，被問會否擔心惹來現實中的另一半呷醋？他口窒窒說：「我真係冇拍拖，點會驚？我單身嘅。」戴祖儀亦公開表明與羅天宇沒有約會，只為傾公事，至於羅天宇是否她心中那杯茶時，她有點不知所措：「唔係，因為…佢啲前任太完美…我覺得我自己…唔知講咩好，我哋有一齊出去打籃球嘅，因為有隊籃球隊，所以有時會約出來打波，又唔會完全唔聯絡。我係比較遲鈍嘅人，唔係講到出面都感覺唔到嘅，佢真係冇追我，大家係朋友。」
