獨家！22歲《愛回家》吳偉豪女友真身曝光超現實 Staycation後焗認愛

撰文、圖片：東方新地

吳偉豪女友真人露相貨不對辦

22歲的吳偉豪憑處境劇《愛‧回家之開心速遞》中朱凌凌一角入晒屋，外表俊朗形象健康，入行五年未見有緋聞，原來收收埋埋有個金毛女友，一次酒店Staycation，戀情意外被揭，源於一張在酒店房內的私密合照。吳偉豪今年只有22歲，Charlotte被指約32歲，女方不時在社交網上載風情萬種的性感照，濃妝艷抹下似有幾分姿色，不過日前Charlotte與吳偉豪拍拖去洗車，社交網中的索女真人顏值嚴重打折，只有身材是對辦。吳偉豪揀女友，好明顯身形行先。

早前吳偉豪返電視城出席《愛•回家》宣傳活動，由戴住口罩的女友Charlotte親自揸車接載離開，二人返回元朗愛巢半個鐘後再出車，這時Charlotte冇再戴口罩，他們前往附近的自助洗車屋，由吳偉豪負責做洗車男，Charlotte就開定張摺椅坐埋一邊翹埋雙手。洗足個幾小時架車終於洗完白白，現場所見一頭金毛的Charlotte打扮好出眾，身穿低胸貼身上衣配超短褲，露腰露長腿，身材確實是惹火，不過睇完其社交網的照片，再睇到真人，其容貌就真係好大出入，同樣化了濃妝，但Charlotte一對蝌蚪眼加超級厚唇與極高顴骨，五官都顯得非常不自然，與社交網中美圖後的她更是判若兩人。

金毛女友高調放閃得逞

日前吳偉豪去完酒店Staycation，即被爆料指當日他與一名金毛索女Charlotte同行，更爆女方比吳偉豪大足足十年，雖然是姊弟戀，但Charlotte保養得宜，又經常在社交網上載性感照，大騷誘人身材。Staycation後，吳偉豪在自己的社交網放了多張在酒店房內及餐廳的食物照，他穿上一件直間恤衫配黑色手錶，懶洋洋瞓在大床上，又到甚有情調的餐廳食飯兼飲紅酒，他以英文留言：「有時任何人都會想留點時間給自己，去休息、去調整內心，特別是生活在充滿壓力的香港，經過數個月對度假甚至staycation的渴望後，終於到我喇，呢度房靚，嘢食好味，景又靚，到你未？」而Charlotte亦同時期在社交網放閃，貼出與男友去酒店Staycation的恩愛合照，但她卻故弄玄虛，刻意將男方的樣貌遮掩，一時用手機，一時用口罩及卡通黑超，報料者指因為睇到朱凌凌個社交網，相中男子無論打扮、手錶與髮型，都與朱凌凌一模一樣，所以頗肯定Charlotte男友就是吳偉豪。