電影《忘不了》重播！重溫童星原島大地大個仔閃娶長髮日籍女友

Jan 30 2021

ViuTV周六（30日）晚上8點半播出電影《忘不了》，當中令人「忘不了」的中日混血靚仔童星原島大地現在已經23歲，去年5月24日凌晨他突然在微博公布將展開人生新一頁，與同年的日本女友結婚，當日消息一出即得到不少網友祝賀，亦有不少網友搵出佢宣傳電影《某日某月》時的訪問，原來青靚白淨的原島大地雖然在香港、廣州、日本、澳洲四個地方都居住過，反而戀愛史就唔多！

文：東方新地｜圖：新傳媒圖片庫、原島大地微博

《忘不了》原島大地在賽車隊工作

原島大地與太太結婚至今僅半年多，當日他曾表示並非奉子成婚，而是因為當時他要離開東京到富士山附近的神川奈縣的公司工作，擔心會和女朋友相隔兩地感情變得不穩定，因此他便下定決心和女友拉埋天窗。原來原島大地受到從事汽車行業的父親影響，對賽車事業比做明星更有興趣，現在正於日本一個賽車隊中擔任賽車維護的工作，他直言：「以後如果遇到合適的戲我才會接拍，沒有的話我就會繼續做好目前的工作。」

老婆與林穎彤撞樣

去年身在東京的原島大地未有因疫情而影響好心情，在5月24日微博上公布和女友結婚的喜訊：「我結婚啦！老婆是22歲（現在應已23歲）的日本女孩HaRuNa（晴奈）謝謝大家一路以來的關心！願大家平安健康！」並公佈老婆肖像，有網友則指原島大地老婆貌似香港女星林穎彤。

原島大地戲如人生：再次戀愛

原島大地2018年曾重返香港影壇，在電影《某日某月》第一次擔大旗、第一次有感情線、第一次在大銀幕裡和湯怡談一場遙距戀愛，說到愛情，原島大地面紅紅，說做人希望低調一點，不過還是不小心透露了廿歲仔之前只拍過一次拖：「唔係香港女仔，都唔係澳洲鬼妹，係日本人，puppy love，簡簡單單好pure，不過已經分咗手囉！」

靚仔又會打籃球，煲日劇煲得多，以為原島大地返學日常一定係打波有女高中生打氣團、平日不停收告白信、情人節打開locker肯定係被表白朱古力塞爆⋯⋯其實不然。

「咁多年，收過一次朱古力咁大把，仲要係全班男仔人人有份嗰隻⋯⋯告白信都收過一次，不過諗過考慮過，大家性格唔啱，都係拒絕咗佢。好多人睇日劇同漫畫睇得多，以為球場邊有好多愛情故事、球員成日同球隊manager係一對，我喺學校籃球隊、個manager都真係女仔，不過佢好專業喎。同埋練波次次放學都係匿埋喺體育館，根本就冇女學生做觀眾⋯⋯哈哈！」

第一次拍感情戲

原島大地續說：「所以我話我鍾意拍戲，拍《某日某月》時真係好似拍咗第二次拖，不過呢次唔係好似上次咁單純，知道兩個人鍾意都未必可以喺埋一齊，原來現實會將兩個人拉遠、原來身邊會有人反對、原來就算再鍾意但係又不得不離開個感覺係咁，個心真係可以好痛！細個拍戲我根本唔知咩係演戲，去到片場就係玩、對白都係媽咪幫我背、教我唸，今次係我第一次喺戲中有感情線，第一次自己學識投入角色，去理解如果同鍾意嘅人分開感覺係點，感覺唔似係拍咗場戲，而係過咗一段人生、多咗一次心痛經歷。」