尹詩沛由「御用妓女」變「御用師奶」 笑言唔同年代妓女都拿捏得好好
尹詩沛由「御用妓女」變「御用師奶」
尹詩沛自2010年讀無綫藝員訓練班入行，至今已有十年，一直演出閒角，曾被封為TVB「御用妓女」，她笑言：「其實喺訓練班畢業之後來來去去都係演秘書、護士或者妓女嗰幾個職業，我試過一日走三組劇，三組都演唔同年代嘅妓女，所以我依家已經拿捏得好好！」有網民指尹詩沛年紀輕輕已由「 御用妓女 」變成「 御用師奶 」，但她笑說自己只在《 十八年後 》和《 迷網 》中做過師奶：「 我諗又未去到御用嘅，我嚟緊都30啦，唔會介意去演咩年齡，最緊要出嚟冇違和感。」
藝員訓練班出身做街市婆娘入型入格
斬豬肉恰老公飾演惡霸街市婆娘入型入格，一出場已經勁搶戲，潑辣過後，接到老公死訊後的崩潰爆喊，極之催淚，演技超班。原來扮演阿娣嘅尹詩沛畢業於24期藝員訓練班，入行十多年浸足十多年，自然有演技有經驗做乜似乜。為咗做好豬肉婆呢個角色，尹詩沛喺拍攝前專登入街市豬肉檔搵專人教揸刀斬豬肉，企足成日進入角色，做足功課所以咪夠霸氣又夠搶鏡，被觀眾留言盛讚囉！
現實中有樣有身材 與劇中角色差天共地
角色登場後唔少觀眾喺專頁留言讚佢入戲，夠晒乞人憎，市井味出晒嚟，尹詩沛多謝完觀眾都不忘澄清番：「你哋信唔信，其實我真人好斯文㗎！」睇佢網上po啲相，有樣有身材，又真係同劇中角色完全係兩個人囉！
