張曦雯由150磅大隻妹變女神 醒你三招減肥秘技
廣告
在劇集《木棘証人》飾演高冷律師的張曦雯，堂堂華姐冠軍、又係公認神級美女、上得大堂亦都貼地親民，連廣大gamer都buy佢，完美如張曦雯(Kelly)都肥過？係！一啲都冇誇張！女神自爆天生高大、青春期又食得易吸收，十六、七歲時身高175cm、體重曾經高達147磅，又高又肥又大隻，女神話自己曾經好似巨人一樣行出街冇晒自信！
撰文、圖片：東方新地
張曦雯醒你三招減肥秘技
少女心事梗係想靚想瘦啦，Kelly話十幾歲人開始減肥，試過忍口唔食嘢、試過果汁斷食法、試過戒油又戒甜，結果瘦得唔多反而反彈更多。經過多年親身經歷不斷失敗不斷嘗試，終於搵到一套獨門秘訣練就一身完美身段，女神公開減肥秘訣，唔係唔跟呀？
第一招：多菜少肉
試過咁多種飲食減磅方法，張曦雯話飲食均衡原來功效最高，蔬菜澱粉質都照樣食，不過份量不宜過多，如果呢餐肉食多咗，自動自覺就要減少澱粉質。
第二招：加工食品少掂
少掂啫，唔係全戒。Kelly話薯片、朱古力如果完全唔食，有時反而會報復性大量攝取，不如適當獎勵吓自己。不過工作關係少下廚，加工食品熱量多又唔健康，一旦有機會，都係盡量揀天然同有機食物放入肚。
第三招：堅持做瑜伽
搵專業教練指導學做瑜伽，一旦習慣做瑜伽，姿勢正確持之以恒，就唔使下下做好耐，一日至少五分鐘已經足夠！
