張景淳背呂慧儀收「小三」大禮 劉依靜轉做PR老闆主動出擊

撰文、圖片：東方新地

張景淳背呂慧儀收「小三」大禮

呢日循例又係有十個八個粉絲等藝員收工，冇幾耐就見到開工收工都同呂慧儀行孖咇嘅張景淳出現，是日呂慧儀難得冇𥄫實，兩個疑似忠粉即時圍埋去有備而來送禮，送上浪漫氣球畀偶像都真係第一次見，連張景淳本人都有啲驚訝唔知點畀反應。睇真啲原來氣球下仲吊住特大禮物籃，送禮嘅唔係一般粉絲而係當年爆出床照、介入周永恆同趙頌茹婚姻做小三嘅 Ruby 劉依靜。係喎，Ruby 家陣係模特兒兼公關公司老闆，勤送禮同明星名人打交道唔奇，不過身為老闆親自送到入電視城就真係少見啲，手段果然同當年一樣主動進取，呂慧儀要睇緊啲！

劉依靜係邊個？「翻版徐淑敏」被指曾做戀上周永恆、唐文龍

劉依靜係模特兒，2009年無綫電視節目《美女廚房》出過鏡，初頭有個外號叫「翻版徐淑敏」，2012年加入香港電視網絡，拍過《Night Shift》同《惡毒老人同盟》兩套電視劇。2014年9月，劉依靜被揭發做香港前歌手周永恒嘅狐狸精，重有疑似佢嘅鹹相流出，但佢否認相中人係自己。近年嚟，劉依靜主力打理同朋友開嘅公關公司同模特兒公司業務。

早前本刊曾撞到佢同唐文龍約會，二人當時表示「了解中」，本來大纜扯唔埋，不過一次友人飯局就將正氣型佬唐文龍同Ruby劉依靜拉埋。據知情者透露：「Ruby覺得文龍好博學，同佢一齊有好多話題，文龍好鍾意研究電影，咁啱Ruby又鍾意睇戲，加上嚟緊Ruby公司會投資搞環保塑膠生意，文龍係支持環保人士，所以成日搵文龍攞意見，佢哋真係好投契！」

心花怒放

日前本刊獨家斷正二人到尖沙咀拍拖撐枱腳直落睇戲，當日傍晚時分，唐文龍在尖沙咀亞士厘道一間茶餐廳外同友人傾偈，未幾就一個人入餐廳搵了一個隱蔽位置坐低，大約15分鐘後，女主角終於現身，當日Ruby明顯悉心打扮會情郎，甫坐低已經對住男神冧到爆，唐文龍打開餐牌介紹Ruby有乜好選擇，但似乎食物吸引唔到佢，對眼全程望到男神實一實，食物未到，唐文龍心花怒放講唔停，還攞出一本命理書同女方講相學運程，女方就嗒晒糖托住腮聽到入晒神。撐枱腳個半小時，由唐文龍埋單一齊離開，兩人急急腳截的士轉場去黃埔，原來係拍拖睇近期熱爆電影《逆流大叔》。