家好月圓 | 李司棋︰拍嗌交戲拍到血壓高

文、圖：東方新地

記：東方新地記者 李：李司棋

「關菊英背對白一字不漏連標點都有埋」

記：《溏心風暴》系列你同關菊英啲嗌交戲好多，拍完一定好攰！
李：好彩對手係關菊英，因為佢真係一個好好嘅演員，佢講對白係唔會漏一個字，劇本入面係咁就咁，幾乎標點符號都有埋，因為佢個態度係咁，我更加要交番戲畀佢，即係乒乓波咁，佢打過嚟，我打番過去，我覺得佢係好好嘅對手。

談後輩應有的演員態度

記：通常都一take過？
李：咁我又唔會話自己一定可以一take過，但都唔會太多NG。
記：啲後輩面對你會唔會好有壓力？
李：我覺得，我畀你壓力，你畀我壓力都係好，喺做戲嘅時候的確需要咁，如果唔係大家都鬆散，當NG係好隨便嘅事，依家啲科技咁好，做唔到，錯一句，之後返去剪接幫你接番埋，大家愈嚟愈縱自己，咁你嘅戲會好咩？唔能夠自己嘅戲未到位，於是乎十句cut兩次嚟做，如果係精神唔夠或者太忙無去溫習，我覺得一次、半次可以，但唔可以做成一個習慣。

「黎諾懿幫我度血壓一度先知成二百幾度」

記：嗌交戲係咪真係好攰？拍完使唔使抖番一個鐘？
李：拍嗰時我唔覺得攰，反而嗰日我會好興奮，因為係戲肉，有個支持力，但做完就會覺得攰。拍《家好月圓》我好多戲都係有衝擊，有時又會喊，又唔夠瞓，我時時都好頭痛，琴姐（李香琴）就話：「我睇你血壓高！你會唔會血壓高呀？」我話：「唔會，我家族無血壓高。」第二日黎諾懿帶咗個血壓計，一度，二百二十幾，跟住我話：「你個機壞咗！」哈哈，琴姐就好緊張：「你二百幾，唔可以再郁㗎嘞，你應該去醫院瞓床！」第日又有第個人又帶血壓計嚟，一度都係咁高，我真係唔知自己血壓高，仲高到咁，後尾我都有睇醫生，醫生都話我血壓高咗，但只係一輪，跟住又降番。

記：拍嗌交戲多搞到血壓高！
李：好多演員都有呢個問題，係人嚟㗎嘛，你估做戲嬲嘅時候係假嘅咩？真係因為對白、劇情而嬲，我係做戲啫，但我係真係用個情緒，好多演員都應該小心呢樣嘢。

「唔想畀人知有cancer」

記：講開健康，你曾經病過（子宮癌），身體上同心靈上有無咩體會？
李：人有健康嘅時候就要去到盡，喺情緒各方面唔好好似每日都困自己喺愁城，我自己無論有啲咩唔開心嘅事，我有我嘅方法對付，我唔會鑽牛角尖。反而我會多啲約朋友，同朋友一齊傾吓偈，會緩和咗心情。唔好畀件事影響，當你畀佢（情緒）拉低咗，你就返唔到上嚟。好似我當時，我唔會話因為我有病我就死嘞，我唔會諗呢啲嘢。同埋我知道我個病係唔死得嘅，因為好初期，只要我好好地醫治，所以我亦都決定唔好講畀人聽，因為我唔想其他人唔知用咩方法嚟諗我，你都知道（傳媒）會寫到你好似就嚟唔得咁，啲讀者睇到：「哎呀，佢cancer呀，可能唔得嘞！」跟住過兩年，無事喎，我覺得對大家都唔好，不如就唔好提、唔好嚇人嘞。

爆唔續約無綫原因：「唔想兩三個月冇得瞓﹗」

記：仲有咩角色想做？係咪永不言休？
李：我依家無再（同無綫）簽合約，係因為我覺得我實在係唔能夠再因為一套劇，而有兩、三個月每日都瞓好少，我覺得係時候要選擇一下我要做啲咩，個工作唔好太過heavy。但係我做㗎，如果有好好嘅角色、夜晚畀我瞓番覺，我唔係瞓好多啫，我瞓六個鐘頭，係咪都應該呀？每個人都應該有睡眠，第日先至做到嘢。

點名讚黃翠如、陳展鵬

記：有無欣賞嘅後輩？
李：我一路都好鍾意（黃）翠如、香香（岑麗香）、（陳）敏之，好多個都好好，有時合作之後會鍾意佢哋，龔嘉欣都好好！
記：男仔呢？
李：我鍾意展鵬！展鵬好乖㗎，展鵬好小心做人㗎，同埋佢幾攰都好，工作擺喺佢面前，佢就向前行，我覺得佢好唔話得，真係好攰㗎，佢又要拍打戲、又唔夠瞓，同埋佢嘅生活係非常之乾淨，唔係飲酒呀、四周蒲去癲呀﹗