45歲佘詩曼著出少女感、沈殷怡示範Oversized衞衣 女星示範秋冬衞衣穿搭術
撰文、圖片：東方新地
黃翠如
翠如 BB 平日喜歡求其笠件衞衣，整日宅在家，完美演繹出衞衣嘅休閒真諦。
湯洛雯
蜜運中又清減咗，靚湯連著衫都大膽咗自信心番晒嚟。不過遇上大面積圖案尤其係人像呢啲好蝦人著，冇咁 sharp 醒靚樣又冇番咁上下青春，真係唔好亂試。
張曦雯
顏值身材皆屬上乘，呢件紫色衞衣都唔止一次出鏡，係女神張曦雯至愛，尤其晨早流流開工前上妝準備時，披上身夠晒方便。
陳瀅
眨吓眼陳瀅都已經31歲大個女，不過一件衞衣加一對小女孩髮夾，又輕易回春變番個大學生。
Lilian Kan
邊個話衞衣一定包到實滴肉不露？其實衞衣都可以揀番啲跌膊露腰款，時尚之餘又可以派吓福利，不過LilianKan呢種少布到咁，都算極致。
連詩雅
點樣令衞衣穿搭冇咁沉悶？好似連詩雅呢身鳳凰圖案衞衣拼百褶裙，識得配搭一樣可以著得又潮又有台型。
沈殷怡
Oversized 衞衣著上身好容易變得肥腫難分，好似沈殷怡一樣以超短熱褲打底，再襯番對波鞋，登時變得型格十足。
馮盈盈
長身衞衣當裙著都係好多人至愛，可以學似馮盈盈襯番對過膝長 boots，即時由隨意變時尚，一對大長腿即變焦點。
蔡思貝
入行六年，僅僅29歲已經有大將之風，蔡思貝一件淨色鴛鴦袖衞衣看似簡單，不過就愈睇愈有當家花旦霸氣。
譚凱琪
囡囡啱啱滿月，表示最快要明年至會復工嘅譚凱琪，去年初拍攝為人妻為人母前最後一劇《失憶24小時》活動時，都揀番套紅噹噹衞衣，襯番個喜慶心情。
黃嘉雯
19年港姐冠軍兼最完美體態獎嘅黃嘉雯，形象一向高貴離地，衞衣配長裙就穿出親和力，又帶點仙氣。
