43歲「女兒控」陳展鵬拒賣女搵銀 劇接劇工作冇停手一個人養兩家
撰文、圖片：東方新地
陳展鵬《唐人街》臨時被抽起 兩年冇劇上
對上一套劇出街已經是18年的《天命》，等足兩年原本被安排緊接《反黑路人甲》在九月播出的《唐人街》，卻臨時被抽起改播《 C9特工》，令煎 Pang由期待變失落。據知情者透露：「等咗兩年先有劇播，加上《唐人街》被指係新版《城寨英雄》，煎 Pang梗係好期待啦，點知突然間話抽起，最初佢真係好唔開心，好彩呢兩年佢畀老婆單文柔樂天性格感染，個人冇以前咁執著，加上返到屋企一見到囡囡咩煩惱都全消，佢好快已經收拾心情繼續工作！」據知新劇《唐人街》臨時被抽，有傳是因劇中有一場劉穎鏇被姦的戲份相當之激，令劇集至今未取得內地批文，由於劇集計劃中港兩地聯播，亦因此要延期播出。
阿媽醫療費用不菲 一個養兩家唔容易
雖然新劇播映無期，不過煎 Pang剛同無綫續約，劇接劇工作冇停手，除了要賺錢養妻女，身為一家之主的煎 Pang，更要擔起父母的生活開支，由於煎 Pang媽咪18年在寓所跌傷及中風，近年身體每況愈下，單是媽咪的醫療費用亦不菲，煎 Pang更要努力工作賺錢。據知情者透露：「疫情下好多人都少咗工作，不過煎 Pang同TVB啱啱續咗約，今年已經拍咗兩套劇，年底又定咗有新劇由佢擔正，工作冇停過，對佢嚟講，有穩定收入先最緊要！依家煎 Pang要養兩頭家，雖然阿媽有阿爸照顧，不過父母租住嘅西貢屋苑每月租金都要兩三萬，而且佢媽咪經常要進出醫院使費好大，佢都希望可以接多啲 Job，不過，依家小豬比開始大，煎 Pang都要留多啲時間陪囡囡，最近《超能使者》煞科，佢亦趁新劇未開工，日日喺屋企湊女！」
BB用品睇中小豬比陳展鵬拒賣女搵銀
愈大愈可愛的小豬比，除了將暖男爸爸煎 Pang融化，原來更吸引不少廣告商垂青，近期便有不少 BB用品廣告向小豬比打主意。據知情者透露：「小豬比得意又活潑，細細個已經勁多表情，真係人見人愛，煎 Pang夫婦每次 Po囡囡啲相出嚟都好受歡迎，加上煎 Pang做咗爸爸之後，好爸爸形象更加入屋，呢排就有好多 BB用品廣告商打小豬比主意，搵煎 Pang一家三口拍廣告，不過，依家疫情關係，煎 Pang已經好少帶囡囡出街，佢更加唔會冒險帶個女出去拍廣告賺錢，所以統統都推晒，不過如果簡單可以自己拍片放上 IG嘅宣傳廣告，煎 Pang都會嚴謹篩選。」
