大台爆新一代離巢潮《愛‧回家》成重災區 上位中都走！劉子碩、余思霆宣告回台灣

撰文、圖片：東方新地

TVB爆新一代離巢潮

22歲的劉子碩（Zac）生於寶島台灣、讀過上海戲劇學院、能演能唱最緊要高大靚仔形象陽光，18年來港發展去年簽約星夢，日前 (11月9日 )出街的《 #後生仔傾吓偈》突然變成劉子碩歡送會，而 Zac亦在出發前一個星期在個人 IG正式宣布動向：「來香港兩年多，下禮拜要離開了！這兩年有多辛苦多幸福我都會收在心裡，希望大家可以祝福我的決定，不要覺得可惜或遺憾，因為未來發展成甚麼樣子我都會完全接受。香港的家人朋友要常常給我打電話喔，現在這一刻真的超級踏實，一切都很圓滿，感謝！」

唔止 Zac一個，明明香港有個男朋友朱敏瀚，17年華姐冠軍余思霆都話返老家。據悉因為台灣疫情穩定、余思霆又持有台灣護照出入方便，被無綫特派到台灣拍攝旅遊節目《台北玩起來》。不過拍攝節目最多兩、三個月，余思霆就話未知回程、短則半年長則一年，機票都索性買單程，仲出埋 Po道別又係多謝香港朋友和貴人、話會掛住香港，其實呢個 job前，余思霆坐冷板凳超過半年，曾言對前景感迷惘。

被劉子碩出賣？余思霆背男友朱敏瀚孖黑衫男夜蒲跳貼身舞

不過朱敏瀚早前獲得無綫「飛躍進步男藝員」獎，人氣急升，其女友余思霆雖然正身在台灣拍攝節目，但兩人仍不時在社交網上互動放閃，不過同樣身在台灣的劉子碩日前在社交網上晒自己和余思霆到夜店夜蒲的影片，片中余思霆就被發現同一名黑衫男大跳貼身熱舞，玩得勁癲。

對這段影片，余思霆解釋話：「我哋都係外國返嚟嘅一班朋友，所以玩得比較癲少少，其實嗰個場係基吧嚟嘅，哈哈！」她又指自己近期都是在台灣拍攝無綫新節目：「希望大家多啲關心我玩以外嘅嘢！」

過檔友台新希望

現今娛樂生態與以往大不同，又有大把離巢後發展更好收入更高成功例子，半年來不少資歷尚淺剛剛起步男丁小花都先後離開電視台，尤其《愛‧回家之開心速遞》最多人事變動，「細龍太」陳偉琪衰醉駕隨時被解約、「 Dorothy 」邱晴同「 GiGi 」陳婉婷分別轉投ViuTV、仲有「垃圾清」周梓盈、「 Keyboard 」李興華不獲續約。不過舊嘅唔去新嘅唔嚟，離開無綫分分鐘更多機會，而拍足千三集，《開心速遞》又正好換吓血添吓新意，可能都係好事一件。