多功能老婆續集｜飛起朱晨麗、擘面升級！洪永城咬住唔放！

撰文、圖片：東方新地

台慶夜再聚頭 洪永城朱晨麗保持距離

劇裡 Sweet劇外兩人卻因洪永城被爆自加攬啜戲而鬧不和；以為劇集曲終人散三個幾月，一切事過境遷，但原來洪爺怒火未消，至今仍咬住朱晨麗唔放，背後狂唱女方小題大做外，近日再反過來扮受害人，向高層扭計拒絕再與朱晨麗合作，更揚言「有佢冇我」勢不共存，令盛傳將開拍續集的《多功能老婆》隨時要改動陣容，演活巴辣人妻馬思蕾的朱晨麗，隨時被拖累而冇得留低！

台慶夜表演跳舞的朱晨麗，與一班《多功能老婆》搭檔在鏡頭前再聚頭，被傳擘面的洪永城與朱晨麗難得同台，被指「零交流」：

洪永城咬住唔放 欲趕絕朱晨麗拍續集

加入無綫八年，近日朱晨麗在《法證先鋒 IV 》及《大醬園》演出均有好表現，由她擔正女一的《大醬園》，結局最高收視更高達36.5點，成功令她躋身一線花旦位置，不過未及開心慶功，近日朱晨麗卻被是非牽連，被洪永城「有你冇我」論贈「㷫」！

「洪爺」橫行電視城 懶理和事佬幫口

據知情者透露：「自從17年開始劇接劇拍唔停，洪永城已經當正自己一哥，態度囂張打橫行，班幕後仲幫佢起朶『洪爺』，加戲事件爆出之後，佢當然唔忿氣，覺得朱朱擺明向佢挑機，周圍唱女方小題大做麻煩不特止，仲同高層投訴，話畀朱朱破壞晒佢嘅形象，講明以後都唔想再同朱朱合作，直頭惡人先告狀！講真，以前都有過唔少『鹹豬手』同『鹹豬嘴』事件，當事人一定會被捉去照肺，點會好似洪爺咁巴閉，可以插番人轉頭，其實件事發生之後，都有唔少人試過做和事佬，分別勸佢兩個擺平件事，話晒喺電視城隨時會撞到，無謂面阻阻吖！但洪爺就一意孤行，仲講明同朱朱勢不兩立！男人嚟講，佢都算冇風度！」

監製唔俾面 唔合作隨時一齊 Out走

在《多功能老婆》成功將巴辣人妻馬思蕾演得生動可愛的朱晨麗，一直恨拍續集延續傻大姐形象，今次被洪永城拒合作，隨時再拍無望，加上被對方周圍唱，心情更跌落谷底！據知情者透露：「始終馬思蕾同楊宏立（兩人《多》劇角色）係兩位一體先有火花，洪爺唔肯再同朱朱合作，擺明想將朱朱踢出局，聞說寶華姐計劃開《多功能》續集都考慮過加入新角色，為咗保留原有嘅角色神髓，講明如果佢兩個唔能夠和平共處，就寧願將佢哋一齊 Out走，咁難得先搵到有得發揮嘅傻大姐戲路，朱朱知道之後真係怕冇得留低，呢排都好唔開心！」日前出席劇集宣傳活動，朱晨麗回應遭洪永城拒絕再合作一事， 就表現無奈：「我冇芥蒂，有冇得再合作，拍戲、做活動呢啲都係公司安排，我所講嘅嘢唔會生安白造，件事都隔咗咁耐，唔好再將件事放大！」

朱晨麗有麝自然香 拍三哥卓羲攻內地

其實有麝自然香，朱晨麗近期擔演的劇集收視屢創新高，五月又將會拍攝邵氏與內地合拍的網劇《飛虎3之壯志英雄》，與苗僑偉、吳卓羲、黃翠如合作攻內地市場，唔拍洪永城一樣大把機會，朱朱不如快些收拾心情準備新劇好過。而眼見緋聞女友被篤花，近日趕拍《食腦喪 B 》忙爆的何廣沛，便密密上門呵番女友，日前何廣沛駕駛其 Audi座駕去到朱晨麗的 Parkside寓所，未有將車泊入大廈停車場，反而泊到對面的爛地停車場，落車後，在座位摷東摷西，然後匆匆趕上樓會女友。其實，近日新冠肺炎肆虐，仲有劇開已經是萬幸，與其搞風搞雨，不如用心做好本份，珍惜機會更實際！