周秀娜硬搶余德丞 棄緋聞人夫轉嗒鮮肉

文、圖：東方新地

周秀娜與鄰居余德丞住大坑豪宅

周秀娜升呢後愈見富貴遷入大坑嘉園，除與天王郭富城為鄰，樓上樓下還有富二代余德丞，近水樓台媾仔易，之前一齊去睇戲又捧容祖兒個唱，傳緋聞都不避嫌，早前慶祝余德丞生日仲去歎日本菜。周秀娜余德丞日見夜見甚歡愉，之前跟余德丞日見夜見、被車出車入的蔡思貝被硬搶男友，風騷不再只好與余德丞劃清界線。一山還有一山高，姣精思貝VS 模始祖娜姐，薑始終愈老愈辣，余德丞見異思遷亦好正常。

周秀娜曾被傳撻著人夫電影監製

35歲周秀娜自從13年與髮型師男友Avis宣布分手後，感情一直無著落，雖然與已婚電影監製黃永峰傳緋聞傳足八年，但女神未有認愛，顯然對方並非真命天子。到早前被指與余德丞撻著，娜姐雖年長4歲，但論人生經驗與拍拖戰績，肯定食鹽多過余德丞食米，二人從無合作過，大纜都扯唔埋，有傳因為造型師馬天佑拉紅線而搭上，再加上大家都住在同一棟豪宅內，娜姐近水樓台，很快便把鮮肉余德丞變成囊中物，早前他們不止一次被影到公開同行，被指由鄰居秘撻成為情侶，拍拖睇戲還一齊睇容祖兒演唱會。至於之前與余德丞sweet爆見晒家長的蔡思貝，原來已黯然離場，轉戰胡鴻鈞，娜姐一出思貝即敗走。

回應和周秀娜傳緋聞 余德丞：「將來嘅事話唔定﹗」

面對周秀娜的熱情，余德丞盛情難卻，更天真地妄想自己有機會成為娜姐的真命天子，隨傳隨到陪食陪玩，雖然娜姐唔認姊弟戀，但余德丞早前公開回應將來是否有機會發展時，明顯抱有希望說：「我哋係認識咗一段時間，但只係正常朋友交往。我同佢係住同一大廈，我冇追求佢，不過將來嘅事就話唔定。」

周秀娜煞有介事公開合照

同居於大坑嘉園的娜姐與余德丞，要秘密拍拖易過借火，現年31歲的余德丞，在生日月時生日飯食唔停，蔡思貝未有祝福行動，好友馬天佑為他慶祝，周秀娜亦有同行，當晚余德丞車載娜姐由寓所出發，去到中環由娜姐帶路去到一間沒有招牌的隱世日本料理，二人先入內，其後馬天佑才拎住生日蛋糕到達。本刊記者入內拍攝時，余德丞顯得不知所措，非常尷尬緊張地不停摵手指，更突顯娜姐處事不驚，雖然素顏冇化妝，但她仍鎮定地對鏡頭笑，不過對於是否拍拖，二人都只笑不作回應。

周秀娜樂於主動提緋聞

晚飯後，余德丞體貼地先行到附近攞車，並把車駛正食店門口，娜姐與馬天佑才步出，之後先送電燈膽馬天佑返回半山寓所，二人再一同歸家。拍拖食飯被撞破後，娜姐與余德丞即夾好同一時間在社交網貼出當晚的合照「泄蜜」，雖然合照中還有「紅娘」馬天佑，但一眾網友都紛紛送上祝福，而娜姐更宣布和余德丞「一齊」，她留言說：「Happy Birthday to @yuduck 歡迎加入，3字頭的行列，我哋係一齊……食生日飯。」自拿緋聞來娛樂大家。

娜姐歡笑思貝愁

身邊女伴換了周秀娜，看來余德丞已把曾經和他有影皆雙的蔡思貝拋諸腦後，早前有記者問到蔡思貝怎樣為余德丞慶祝生日，她表示有傳短訊給對方，祝他身體健康、開開心心，但由於自己正開劇未有時間為他慶祝，更笑言怕對方生氣？她說：「怕佢嬲我唔約食飯！」不過自周秀娜與余德丞的戀情愈鬧愈熱後，思貝的態度亦有所改變，早前她在將軍澳電視城為新劇開工，多番斬釘截鐵強調與余德丞從來沒有任何感情關係，至於為對方補祝生日，她說工作要緊食飯好閒，看來余德丞移情別戀令她嬲嬲豬。

蔡思貝遇上老手周秀娜變輸家

蔡思貝話晒都係無綫有名的頂級發電機，今次輸畀娜姐絕對氣頂，至於以為自己已經得米的余德丞，就仍然沉醉於美夢當中，咪當上多人生一課囉！余德丞之前被封「港姐收割機」，緋聞女友包括有麥明詩、蔡思貝、劉穎鏇以及御用化妝師Chloe，依家多一個娜姐，當堂升晒呢！

玩家思貝死撐：由始至終冇感情！

記：本刊記者 蔡：蔡思貝
記：最近忙緊啲咩？
蔡：我最近忙住拍劇。
記：拍劇冇晒時間，怕唔怕同余德丞愈來愈疏遠？
蔡：好朋友永遠在心中，大家都知我專心拍劇會自動消失。
記：之前話會約余德丞食飯同佢慶祝生日，約咗未？
蔡：未得閒，未約，真係每日都要開工拍劇，食飯慶祝生日呢啲嘢，都係隨緣有時間先啦！
記：最近同余德丞有冇見面？
蔡：冇呀！對上一次都係做嘢囉！
記：有冇聽過佢最近同周秀娜傳緋聞？
蔡：有呀！知道啲啦！
記：你信唔信佢哋行埋咗超過3個月呀？
蔡：我覺得佢生日有咁多朋友同佢慶祝係開心事。

記：怕唔怕佢哋真係撻著？
蔡：我唔清楚啦！但我同余德丞真係由頭到尾冇感情上任何嘅關係，只係工作上嘅拍檔同好朋友。
記：咁余德丞有冇約你睇容祖兒個唱？佢咁衰約娜姐唔約你！
蔡：我同賴慰玲睇，佢唔衰呀！
記：聽講娜姐做主動，你輸畀娜姐會唔會唔開心？
蔡：我唔清楚，再重申一次我同余德丞絕對冇喺感情上有任何關係。
記：咁你同余德丞少咗見面同聯絡？
蔡：唔！我拍劇就會消失。
記：咁你依家有冇拍拖？
蔡：我都係專心工作啦！如果緣份到就自然會，有好消息會同大家講。