55歲吳啟華月使廿萬捧女做網紅 12歲女超貪靚似足富貴阿媽

撰文、圖片：東方新地

吳啟華努力賺人仔 每月使廿萬為彌補離婚缺憾

近年吳啟華主力在國內發展，再加上投資有道，在多個省投資飲食業搞得有聲有色，每月付廿萬生活費只是濕濕碎，據知情者透露：「啟華係個好盡責的好男人，得一個女，點會唔錫到燶？小豬豬5歲時兩公婆就離婚，啟華為搵食周圍飛，石洋子又成日唔黐家，囡囡主力由婆婆照顧，啟華唔可以成日陪個女，唯一做嘅就係盡力彌補，滿足佢所有要求。小豬豬細個時話鍾意唱歌、跳舞同彈琴，啟華多多錢都畀，最想佢學多啲嘢，物質上從來不缺，要乜有乜。

到近年小豬豬開始長大，佢見媽咪成日扮得靚靚影相放社交網，佢亦開咗個微博帳戶，自己影相修圖，雖然依家得11歲，但已經好早熟，成日跟媽咪學化妝，而婆婆見到小豬豬愈大愈似石洋子不知幾引以為榮，直頭想捧個孫做星。之前小豬豬開始留意韓國潮流，成日話要買衫買化妝品，仲叫石洋子帶佢去首爾玩，所有錢都係啟華畀，每個月使成廿萬都面不改容，只要個女開心佢覺得使多多都值得。」

小豬豬以母親為榜樣貪靚學化妝做網紅

有個顏值為本喜歡扮靚周身名牌的母親石洋子，小豬豬亦遺傳了愛美基因，最近她在微博上載的照片，全部都是經過修圖，張張都是化了妝，而她的打扮不再是小朋友，今年底才滿12歲的她，五官甚有母親的影子，打扮與拍照擺 pose亦大個女跟足韓風，學做網紅吸納粉絲。因為受到父母影響，小豬豬自小已對娛樂圈充滿憧憬，我的志願是做明星，自幼被重點培訓的她已是鋼琴高手，不時參加公開比賽，婆婆早前亦在微博上載小豬豬參加比賽時的照片，又公開了一段小豬豬拍微電影的片段，小小年紀對住鏡頭完全不怯，看來小豬豬天生注定食呢行飯。

離婚已六年的吳啟華，對於未能給女兒一個完整家庭一直耿耿於懷，他承認自己是一個不及格的爸爸，離婚三年仍未向女兒解釋與石洋子離婚一事。雖然曾多次傳出與石洋子復合，但吳啟華曾在訪問中否認說：「我同洋子就好似親人一樣，因為佢始終係我個女嘅媽媽，但復合已經唔可能。」女兒踏入少女期絕對需要父母在身旁指引，不過吳啟華事忙，石洋子又鍾意歐遊玩樂享受人生，小豬豬跟住婆婆生活，繼續專注扮靚沉迷做網紅，幾年後將會有一個倒模石洋子面世。