《十八年後的終極告白》豬肉婆起底 29歲尹詩沛有樣有身材

撰文：東方新地、圖片：東方新地/尹詩沛IG

尹詩沛藝員訓練班出身做街市婆娘入型入格

斬豬肉恰老公飾演惡霸街市婆娘入型入格，一出場已經勁搶戲，潑辣過後，接到老公死訊後的崩潰爆喊，極之催淚，演技超班。原來扮演阿娣嘅尹詩沛畢業於24期藝員訓練班，入行十年浸足十年，自然有演技有經驗做乜似乜。為咗做好豬肉婆呢個角色，尹詩沛喺拍攝前專登入街市豬肉檔搵專人教揸刀斬豬肉，企足成日進入角色，做足功課所以咪夠霸氣又夠搶鏡，被觀眾留言盛讚囉！

相關文章：《十八年後的終極告白》大結局 – 譚俊彥「黑化」再次犯案、陳山聰為好友犧牲？！

29歲有樣有身材 與劇中角色差天共地

角色登場後唔少觀眾喺專頁留言讚佢入戲，夠晒乞人憎，市井味出晒嚟，尹詩沛多謝完觀眾都不忘澄清番：「你哋信唔信，其實我真人好斯文㗎！」睇佢網上po啲相，有樣有身材，又真係同劇中角色完全係兩個人囉！