內疚令病母延醫 惠英紅：佢唔認得人
延伸閱讀：
恭喜恭喜！舒淇 馮德倫結婚了
《巨輪II》Rachel Sam重遇最感人
母病情惡化感內疚
新：新地 惠：惠英紅
新：最近忙咩？
惠： 宣傳《幸運是我》，套戲講腦退化症，希望喚醒大家關注愛。初頭我唔諗住拍呢套戲，因為要演八十歲太老，接受唔到，又覺得冇信心做，但係想拍我媽咪嘅嘢，因為我媽咪五十幾歲已經老人癡呆，但我哋唔知，蹉跎咗佢好多時間冇幫佢醫病，個關係愈嚟愈惡劣，我對佢好差，唔體諒，淨係覺得佢變得不近人情、好煩、冇責任感，原來佢係有腦退化症，到佢七十歲有次跌傷，醫生同佢傾偈，覺得佢思維好混亂，話佢係好嚴重嘅老人癡呆，一照完磁力共振，我好震驚，見到佢頭骨好大，個腦得好小，原來因為我無知，唔知佢病冇幫佢、冇體諒佢，好內疚、好自責，因為我哋個年代一路覺得老人癡呆係八、九十歲，冇諗過我媽咪五十歲就開始有，所以今次拍呢部戲，好想拍我媽咪真實嘅嘢，想俾訊息有緣者多啲關注腦退化症呢個病。
去年戲接戲下， 連拍了七部戲，「我唔想咁，但有好嘅劇本唔想放手，有啲今日拍完、明日開新，但我唔俾自己疊期，第一我唔想兩套都唔好，第二我鍾意每個角色都設計到唔同，我唔想影響自己。」
新：後尾你同你媽咪點？
惠： 佢成日會唔記得嘢，係用忍耐、包容，盡量陪喺身邊，好坦白講，照顧者都係辛苦，因為佢幾分鐘嘅嘢都唔記得，戲入面有一場講電視搖控器嘅衝突，其實係現實中我媽咪同我一條好大嘅刺，我媽咪一日五、六十次叫我開、關電視轉台，但佢完全唔記得幾分鐘前係叫我熄電視，我一行開，佢就嗌晒救命要我嚟開電視，有次我太嬲，忘記咗要包容，開完電視，將搖控器掟向佢身邊，鬧：「你係咪想整死我，我好攰，你究竟俾唔俾我抖？」我阿媽突然好委屈、好徬徨，含住眼淚話：「我真係唔記得呀！」我見到，唔敢再糾纏，即刻行開，因為我唔想將件事拖好長，佢會記住，我行開冇耐，我阿媽眼淚都未收，又笑住嗌我開電視，所以我拍嗰場戲專登將個情緒攞番出嚟，呢場戲好多人睇完都喊，但我唔係刻意想人喊，而係真實我當時感覺到我媽咪嗰種徬徨無助，想演繹番出嚟，for訊息又好，for拔番我心中條刺又好，因為依家我媽咪瞓喺度，四肢都唔識郁，任何嘢都唔識，淨係識得呼吸，每次見到佢我都好內疚。
在新片《幸運是我》演腦退化症患者，因現實中親母同樣患有此症，令她感受特別深。
新：聽你咁講，呢部戲都叫糊！
惠： 我冇刻意諗過呢樣嘢，不過最近翁子光導演寫咗一篇文章之後，好多人問我呢個問題，當然有我梗係開心，但我主要諗啲人認唔認同我演咁老，啲人睇完話演得似，我已經好開心。
全文完
