獨家！《九五至尊》57歲江華師奶上身靠麥潔文撲水養家 出道多年黑材料爆不停

撰文、圖片：東方新地

江華靠太太擔起頭家

年前轉型保險業、閒時繼續接騷的江華，因為疫情關係，再沒有北上登台搵銀呢支歌仔唱，太太麥潔文擔負起養家重擔，一代師奶殺手就搖身一變做埋師奶，採購日用品、補倉買糧、仲有買廁紙清潔消毒物資連帶一家之煮重任，全部落喺江華身上！

江華入行35年，一向以比劉 (德 )華更似劉華見稱，亦都曾經遊走於兩大電視台之間，師奶緣爆燈係收視保證，轉行賣保險的江華工作自由度大，彈性上班時間，近年間中登台、陪太座出席活動，早前更在社區會堂開騷，至近月疫情爆發才暫停接騷，而太太麥潔文的唱歌學校亦因疫情關係一度停課或縮班教學，令收入大減，知情人士透露：「 Kitman間學校要交租，之前啲登台搵銀又停晒，但為咗保持曝光率，之前仲帶埋囡囡天天上《流行經典50年》，呢啲時勢去邊都有危險，但為咗搵錢都冇計，唔通坐喺屋企等運到咩？」故此比較悠間的江華便肩負起買餸煮飯代替老婆打理頭家之重任，日前又一支公超市超市混在師奶堆中，大舉採購家居用品。

超市熟客仔 買個餸都要型仔

邊個話男人打理唔嚟家頭細務？工多藝熟，好似江華咁一樣可以心思細密打點周到。入到超市先撲糧食廁紙等必需品，再行去清潔用品區補充手套、消毒用品和清潔用品，為太太、女兒仲有身為醫護一分子的兒子把守家居防疫一關。最後買生果，江華都識揀最低脂又高營嘅香蕉同水果中最高維他命 C的奇異果。當年全盛時期一直貪靚舉手投足都似劉華，亦時有黑材料爆出拍戲遲到早退為個「靚」字違導演意思，江華雖然淡出多年，出街買個餸行個超市都一樣有型有款全身襯過，不過研究消毒用品成分時要戴上老花眼鏡、雙手亦青筋滿布老態盡現，再貪靚始終不能抗衡歲月洗禮。