世界妹林穎彤入行11年識冧人 曾越級媾黃宗澤自稱「波波B」
撰文：東方新地、圖片：東方新地/林穎彤IG
林穎彤曾越級媾黃宗澤
16歲參加無綫同商台合辦的「十人巷」勝出加入無綫的林穎彤，轉眼已經在TVB十一年，不過，近年才開始受力捧，演出作品最令人印象深刻的，要算是2016年在劇集《城寨英雄》演孖辮妹鑫鑫，坎坷遭遇成功博到大家同情，開始受網民關注。不過，多年來事業還不及緋聞精彩，最出位莫過於2011年拍劇集《潛行狙擊》越級媾黃宗澤，當時Bosco同胡杏兒八年情告吹，Bella更周圍唱自稱係男方女友「波波B 」，成為一時佳話，不過事件爆出， Bosco走夾唔唞，Bella 博做正印最終夢碎！
入行11年最識冧人
媾唔掂黃宗澤，繼續以可愛冧仔的Bella仍不愁寂寞，同訓練班出身奀星容天佑有兩年時間打得火熱，後來識到同公司星夢娛樂的新人Alvin（伍富橋），佢好快已經撇甩容天佑，極速以高招冧掂呢個富二代！除了高招收兵，林穎彤更加冧掂星夢娛樂老闆何哲圖，拍開劇嘅佢17年被星夢簽為旗下歌手後備受力捧，除了拍劇演出綜藝節目 keep人氣，近日同伍富橋合唱新歌〈迷魂陣〉，更被安排拍MV大力宣傳，兩人又合跳拉丁舞兩度上大騷《歡樂滿東華》及《星光熠熠耀保良》演出。
做世界妹面面俱圓
據知情人士說：「 Bella好識冧人，對住Herman（何哲圖）更加好識做，成日老闆前老闆後，不停賣口乖氹到 Herman好開心，唔係點會咁多機會吖！佢係醒目女，會睇準形勢，知道一姐 Hana（菊梓喬）好得寵，佢都成日 mark到實，話晒氹掂一姐點都著數啲，不過佢好識做人，唔會搞對抗得失其他人，就算同 Hana面和心不和嘅 Jinny（吳若希），佢一樣同對方 friend，絕對係世界妺！」
